首頁 日報娛樂

《全民造星》三大男神談女神 傳簽勁辣賣身契入十強 姜濤驚爆疑似整容

07/09/2018
招牌手勢
拍攝當日,姜濤剛綵排完昨晚舉行的粉絲見面會表演,雖然一臉疲態,但叫姜濤擺出招牌畀心心Pose都無Hea做,雙眼皮依然好深。
招牌手勢 拍攝當日,姜濤剛綵排完昨晚舉行的粉絲見面會表演,雖然一臉疲態,但叫姜濤擺出招牌畀心心Pose都無Hea做,雙眼皮依然好深。(1/12)

        ViuTV選秀節目《全民造星》成為熱話,節目在連登被瘋狂討論,當中堪稱三大男神的19歲上海仔「小鮮肉」姜濤、24歲Ian(陳卓賢)及26歲Anson(江熚生)最令姐姐們茶飯不思,在討論區無限示愛。究竟男神們眼中嘅女神係邊個?另外,對於有傳要同ViuTV簽勁辣賣身契先可以入10強去美國受訓,三位男神對傳聞唔驚訝,但答得相當小心。最重要係,姜濤17歲時減肥中拍攝嘅微電影《一線之差》近日出土,當年嘅佢眼又腫,雙眼皮又失蹤,疑似整容。

微電影中的姜濤較圓潤外,最明顯是一對單眼皮,他對提問似有備而來,輕鬆解釋,「我嗰時減緊肥,係有啲水腫,同埋我本身內雙眼皮,黐咗一段時間雙眼皮膠紙就變咗o依家咁,當然都要睇狀態,如果水腫就要黐番。」問到會否割雙眼皮?佢答:「未割呀。」講到公開處男被瘋狂討論一事,姜濤表示唔開心,「我冇諗過大家會攞嚟討論,當日我係一時情急先講吓笑!(唔係真?)我唔會再答,等大家估吓。」

簽約換入圍

  至於有傳ViuTV與有潛質的參賽者以10年合約作為條件,換取到美國受訓及入圍10強,5年生約是指ViuTV可單方面放棄雙方合作,但參賽者則無權提早終止合約。姜濤覺得入10強唔關簽約事,但承認,「我知係有啲人簽咗約,但我冇簽。」而Ian同Anson就話冇聽過。另談到有傳是內定冠軍,姜濤答得坦白:「我幾希望自己係內定冠軍,真嘅話唔使咁大壓力。」

被拯救之愛

  提到當年令姜濤決心減肥的暗戀對象,佢話係同班同學,吸引他除了外表,仲有女方肯同佢呢個冇自信冇朋友又唔起眼嘅肥仔做朋友,就好似超級英雄咁拯救咗佢,「佢幾靚但唔識打扮,唔似一般主流女仔,唔鍾意同人埋堆,同佢玩吓玩吓就玩出感情。(係你單方面玩出感情啫?)係呀!我從來冇向佢表白過,離開咗學校咁多年亦冇再聯絡。」

姐姐有巿場

  好多姜糖(姜濤Fans稱呼)都想知道,究竟要咩資格先做到姜生嘅女神?原來佢鍾意日本女星有村架純同松嶋菜菜子,年上和年下都無所謂,最重要相處到,同埋唔可以太有機心,唔八卦同唔是非。至於拍過4、5次拖的Ian同7、8次拖的Anson就堅稱現在單身,兩人同樣冧大眼妹,前者揀女友最重要性格好,「成熟同體貼,所以同過大我少少嘅女仔拍拖。」而Anson鍾意可愛型,「最重要開朗同搞笑,但Hot嘅女仔都鍾意睇(笑)。」問到心目中嘅「女神」,Anson鍾意韓國女團SISTAR嘅寶拉外,當然仲有好深愛佢嘅主持黃心美,而Ian就話無女神,「聽歌聽男仔歌,女藝人關注度咁高。」再三誘導下,Ian依然得個諗字更向公關求救,全場靜過太空,最後佢以扁嘴作結。

採訪:廖思慧、杜淑霞 攝影:李權威

其他文章
林偉 阮兒渴望新嘗試 白雲唔驚死最愛刺激玩意

最近在TVB劇集《鐵探》中有驚險演出的白雲,即將到台灣拍攝旅遊節目《3日2夜》,她表示...

hd