結婚十周年 買嘢O氹自己 紅唇陳慧琳多人服侍

　　幸福人妻陳慧琳（Kelly），唔經唔覺上周二(2日)就係佢和丈夫Alex(劉建浩)結婚十周年嘅大日子，不過當事人坦言唔會二人世界，亦唔會特別買禮物。日前下午，化咗個靚妝、鮮紅色唇膏好鬼搶鏡嘅Kelly，偕助手去中環名店Shopping。見佢專揀銀包、潮袋等，全部女人嘢，另一半無份O架！同老公講心嘛！ 採訪 : 張詠森

　　潮媽Kelly日前以大使身份出席「第七屆十一良心消費運動」啟動禮，有記者問佢跟老公Alex結婚10周年紀念如何慶祝？人妻竟大懵忘記，其後坦言若要慶祝嘅話，會一家四口喺屋企慶祝，亦唔會特別買禮物，因為兩夫婦太懶喎！

　　唔使買禮物畀老公，Kelly日前就出動買嘢O氹自己。日前下午，白tee牛仔褲、孭住個Chanel手袋嘅潮媽偕女助手去置地廣場開心shopping。見助手已有兩袋戰利品喺手，兩人再入名店睇嘢。見Kelly初頭主攻銀包、卡片套等，銀色和黑色鉚釘款嘅都好like，揀咗成十分鐘，最後買晒兩隻色啦！之後再睇中一個豹紋小手袋，售價約2萬6千，難得「一見鍾情」，又掃埋啦！最後掃咗一袋，再行過另一間名店，是日Kelly應該好滿足囉！