首頁 日報娛樂

老婆心痛 王祖藍首做導演30小時無瞓 大肚李亞男外賣牛肉麵慰夫

12/10/2018
■頂住大肚化身外賣妹的亞男,竟不獲祖藍讚賞,當然嬲到要摑他啦!
■頂住大肚化身外賣妹的亞男,竟不獲祖藍讚賞,當然嬲到要摑他啦!(1/5)

        百足咁多爪的王祖藍,最近首次執導賀歲片《你咪理,我愛你!》,碌盡人情咭搵嚟多達60個主角參與演出,其中老友王菀之更一人分飾三角;日前在山頂拍攝一場婚宴戲,菀之化身恨嫁伴娘,狂搶花球相當落力。不過,老友始終唔及老婆李亞男咁細心,知道祖藍掛住開工,唔單止通頂無瞓,仲冇啖好食。頂住7個月大肚的亞男,親自去賭王千金何超蓮開設的台灣牛肉麵店買外賣送到現場,不過抵死的祖藍對於老婆溫馨慰夫舉動,竟然回應:「當愛已成習慣!」搞到亞男忍唔住摑他兩把,不過佢哋咁恩愛,當然係玩吓啫!

祖藍話首次做電影導演,竟然揀咁冷門音樂劇題材,只因是多年情義結,「我一直都好鍾意音樂劇,唔拍過我唔會死心,而呢套百老匯音樂劇係最易入口,就算未睇過音樂劇嘅觀眾都會接受到。不過題材係冷門㗎!所以無論搵投資者定係搵演員都食咗好多檸檬,但呢個唔係最困難地方,反而傾版權花咗好多間,幾個月前先搞掂晒,夾埋賀歲檔上映,得番20日時間正式拍攝。」

人情債有排還

  好彩祖藍10年前已負責將該百老匯音樂劇,改成由風車草劇團演出的粵劇音樂劇《你咪理,我愛你,死未!》,所以對該故事極之了解,慳了不少前期準備時間,加上不少好似菀之等好朋友,甫開波便答應演出,「呢個圈好難得有個王菀之咁嘅人,同我一樣咁鍾意音樂劇,所以我一問佢就應承,仲好投入同緊張個演出。其實今次真係拍咗好多人膊頭,呢啲人情我會慢慢還嘅。」

  由於要邊剪片邊拍攝,祖藍當然會無乜時間休息,這天晨早4點又要到現場準備,無瞓接近30小時,令老婆亞男相當心痛,知道祖藍為食專登打電話問老公想食乜,頂住大肚都即刻去買畀佢食,相當細心。等咗個幾鐘,下午3點見亞男攞住大包小包至愛的牛肉麵外賣到場,祖藍即時笑晒口,雖然嘴裏得戚話:「當愛已成習慣!」仲哼了兩句張學友呢首名曲,但邊大啖咁食,見亞男整理外賣時又會細心扶住老婆,其實祖藍個心勁甜。不過,見到祖藍咁口硬,亞男即回敬他兩把掌,仲話:「我山長水遠排咗一個鐘頭隊,抬咁多嘢上嚟,佢冇任何讚美同讚賞,只係話習慣,我冇嘢好講啦!」亞男講就係咁講,轉頭咪sweet爆咁坐喺祖藍身邊陪佢開工囉!撰文:杜淑霞 攝影:李維隆

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd