首頁 日報娛樂

《寄身》導演同男女主角玩互選 James意外被Cher爆暗戀對象

07/12/2018
■James和Cher訪問期間不停互窒,就知他們因合作變得好熟絡。
■James和Cher訪問期間不停互窒,就知他們因合作變得好熟絡。 (1/8)

  執導泰國靈異電影《鬼影》成名的泰國導演 Parkpoom Wongpoom,最近再有新作《寄身100天》,日前他聯同男主角、演《出貓特攻隊》「柏豪」爆紅的James(Teeradon Supapunpinyo),以及女主角、「泰國版AKB48」女團BNK48隊長Cher(Cherprang Areekul)來港宣傳,三位大談拍攝新戲感受外,被問到互選「寄身100天」的對象時,竟意外踢爆James原來暗戀Cher的隊友Fond,場面極之搞笑。

撰文:杜淑霞 攝影:李維隆

  愛睇靈異戲的戲迷,應該不會對導演 Parkpoom陌生,04年《鬼影》叫好叫座,仲被荷里活翻拍,之後Parkpoom 的題材離不開靈異,不過他解釋並非刻意安排,只要劇本吸引便有興趣,「好似今次雖然有講鬼魂,但我想表達人生嘅意義,我唔排除將來會拍其他嘢,今次戲裏面嘅青春愛情戲,都拍得好開心,或者將來可以拍多啲,不如你再做女主角(笑着問身旁的Cher)。」

  講到搵James演男主角「阿明」,原來導演起初覺得對方太花花公子,無意選他,但經James主動去試鏡後,即令導演另眼相看,仲話:「我差啲睇漏眼,佢真係好努力,拍攝時愈睇佢愈似『阿明』。」James聽罷即得戚說:「你唔揀我到時一定會傷心。」今次是男女主角今次首度合作,兩人都互笠高帽。James讚初次拍電影的Cher好努力,「佢令到我有個推動力,一齊去進步。」Cher就話第一次見到James好驚,「因為佢好叻,演戲又多經驗,加上佢第一句對我講係『我哋工作好認真㗎!』死啦!好驚拖累佢NG。」

  既然電影講鬼魂寄身到另一個人身體的故事,就請三位玩個遊戲,互選「寄身100天」的對象,結果導演和James都爭住做女團成員。導演解釋,「想試吓做BNK團員跳吓舞。」James就話想接觸下BNK其他成員,了解她們生活情況。問到James想了解邊位成員?James尷尷尬尬話冇特別,導演亦搞笑話,「佢有嘅,不過在心中!」Cher即時尖叫再玩踢爆,「我知道,係Fond!」搞到James搖晒頭無奈咁話:「死火啦!」情景勁搞笑!而想寄身做導演的Cher,就話想更加了解導演角度去要求演員的表現。提議Cher做導演後可點鬥氣冤家James做嘢,她即興奮說:「可能叫佢做多啲搞笑嘢!」

其他文章
如個人音樂回顧展 蘇永康首個中樂伴奏演唱會

蘇永康(阿公)將於6月21日及22日假紅館舉行「All That Jazz (&Pop...

hd