首頁 日報娛樂

老公睇得起 梁詠琪苗條人妻着童裝衫

18/01/2019
■素顏Gigi着呢件童裝衫幾啱身,只係腋下位比較窄,以及手袖短啲。
■素顏Gigi着呢件童裝衫幾啱身,只係腋下位比較窄,以及手袖短啲。 (1/7)

  四十二歲嘅高瘦人妻梁詠琪(Gigi),同西班牙籍老公Sergio育有快將四歲嘅大眼囡囡Sofia(祈淑菲),平日最愛一家三口連體晒溫馨。日前傍晚,兩公婆撇下小公主返銅鑼灣巡舖,見人夫化身stylist拎件橫間童裝衫畀老婆試,身材一向好slim嘅Gigi又着得落喎!睇怕過多幾年,苗條媽咪絕對可以同Sofia撈亂啲衫着啦! 採訪 : 梁志明

  梁詠琪嘅混血靚千金Sofia遺傳晒父母嘅高挑身材。早前,本報巧遇Gigi一家三口喺佢兩公婆開設嘅西班牙品牌童裝店密密巡舖,Sofia快高長大,比同齡小朋友高出成個頭,要穿六歲大嘅衫,真係個「長人家族」!

  日前傍晚,Gigi兩夫婦撇下乖女又去咗巡舖。見素顏Gigi戴上口罩同店員傾咗一輪,就同丈夫「玩試衫」。早前被愛妻讚好有taste嘅Sergio,向愛妻遞上一件藍白橫間衫,Gigi入試身室着上身,再出嚟照照鏡又影相。呢件疑似童裝大碼衫着喺Gigi身上都幾fit,只係腋下位比較窄,以及手袖短些少,成四十歲人都着得起件大約十歲童裝衫,都咪話唔happy呀!

  換番自己衫之後,Gigi再同丈夫貼頭揀衫畀囡囡,之後拎住袋衫轉場去附近書店行逛,買咗幾本圖書和練習簿,才揸車返家。

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd