首頁 日報娛樂

密睇醫生 51歲老婆陀B曾大量流血 黃澤鋒唔會 放棄天賜禮物

24/01/2019
拖實老公
■帶上口罩的黃太拖實老公慢慢行,醫生話佢仲未算係穩定期,暫時唔可以用力。
拖實老公 ■帶上口罩的黃太拖實老公慢慢行,醫生話佢仲未算係穩定期,暫時唔可以用力。(1/8)

  現年51歲的前TVB藝人黃澤鋒跟51歲太太陳麗麗(2月22日才52歲)結婚9年,太太在自然受孕下懷孕13周。黃太屬超高齡產婦,她坦言陀B真係搵命博,自爆懷孕第2個月時幾乎大小不保,情況一度好危險:「因為陀B早期出過豬紅般血塊,胎位受血塊影響偏移子宮頸,如果唔及時移返好中心位置,到胎兒愈嚟愈膨脹時,有機會逼爆變內出血,到時大量失血連大人都有生命危險,好彩BB夠硬淨,一個月後回復正常,兩公婆先至鬆咗一口氣。」不過,大肚婆要keep住密密睇醫生做掃瞄,個B未出世就使咗一大筆。

提到幾乎陀B不穩,黃太猶有餘悸:「決定公開喜訊前一周凌晨12點突然流出大量鮮血,情況就好似女人嚟M咁,兩小時後再去廁所,見到成個馬桶都係血水,仲不停咁滴出嚟,當時真係好驚,不知所措,拍醒黃澤鋒商量,佢好鎮定咁打畀家庭醫生問意見,可幸我個肚冇痛,醫生建議我先臥牀,第二朝馬上搵佢跟進。」雖然第二朝依然流出啡色分泌物,好彩只係胎下神經線爆咗微絲血管,對個胎無任何影響,可能嗰晚我冇掩住個肚咳咗兩聲,加上教拳時轉咗個身示範畀學生睇,原來大肚婆唔可以用腰力,真係廢咗武功,唔可以郁動喇!」黃澤鋒緊張說:「當時我喝佢都喝唔切呀,大肚婆連舉高雙手都唔得,佢家族有糖尿病,好易出現妊娠糖尿病,連果汁都唔飲得。」

乙肝帶菌陀B須知

  日前中午,患乙型肝炎的黃太拖住老公去咗中環中建大廈睇醫生,就算使多小小錢都要好好保護個BB,唔想佢喺母體時已受感染。因為排毒唔好,皮膚敏感周身痕搞到瞓唔到嘅黃太好辛苦:「媽咪嗰一代唔識,所以我一出世就係乙肝帶菌者,乙肝會引致肝癌同肝硬化,醫生話懷孕期間酵素會提升,一定要配合藥物治療等肝酵素回復正常水平BB先安全,所以要定期抽血檢查。」黃澤鋒坦言BB未出世,睇私家醫生、接受一系列檢查經已用咗好多錢,正所謂大唔食,細都要食,O依家乜都做搵奶粉錢,他笑說:「我冇400萬,但樂觀啲睇,啲人話小朋友會帶來財富,我相信將來會有,但現階段先帶畀我哋無限快樂。」

網上好多刻薄留言

  黃太承認超高齡陀B係辛苦,最慘仲被一啲惡毒、不負責任網民留言詛咒,話咁老仲生,生嚟攞政府福利,甚至話小心有唐氏綜合症,她說:「可以抨擊大人,但唔好傷及小朋友,好彩網上仲有好多鼓勵嘅說話,真係人間有情。自從早兩年親如子女嘅貓狗陸續離開,我哋兩公婆真係好難過,估唔到上天可以送我一份咁好嘅禮物,我見BB只得兩個月,手腳就識得fing,呢啲通常要3個月先做得到,所以點解唔好好保護佢?我哋家庭計劃生豬BB係deadline,因為豬羊生肖好夾,決定盡地一煲。」黃澤鋒即沒好氣說:「攞4000蚊都咁難,到時都唔知仲有乜社會福利啦。」

  此事引來全城關注,提議黃澤鋒提供秘岌畀57歲劉德華及52歲劉太再努力加油,對此,黃澤鋒大笑說:「華仔係我師兄嚟㗎,佢咁fit唔使啦,要嚟個天都擋唔住。」準爸爸黃澤鋒坦言老婆大肚係一個好好嘅學習過程,「絕對訓練到EQ同心理質素,我仲要理陳大小姐脾氣,我諗我有產前抑鬱症多過佢。」

採訪:方騫平 攝影:李維隆

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd