首頁 日報娛樂

享受身兼多職 鄺美雲豬年飲湯戒口保健康

09/02/2019
祝願平安
鄺美雲與Euro祝願讀者豬年健康平安。
祝願平安 鄺美雲與Euro祝願讀者豬年健康平安。(1/7)

        鄺美雲(Cally)任港區全國人大代表一年,又要兼任政協和社團總會會長,加上珠寶生意和慈善工作,去年忙到有時連食飯都無時間。難得她覺得工作是營養,並享受過程,只是身體有時太攰會患感冒,最難受是引發皮膚敏感,最嚴重一次試過食件蘿蔔糕即眼腫,結果要中西醫合璧治療幾日才冇事。現時她謹記要戒口,預防方法是睡眠充足和保持心境開朗,她的保健秘訣是每天早上飲熱湯和食早飯,再做10分鐘自己改良的健體操,能keep fit又可保持容光煥發。

        Cally表示能夠為大眾服務、積極行善助人是開心事,過去一年真的過得很充實。她表示最忙一天可以由朝工作到晚,連食飯的時間都唔夠,但因她熱愛工作,從來不覺得辛苦,不過她直言最大挑戰是對抗病魔,她稱:「有時我做嘢做得好開心,但可能體力支持唔住太攰,舊年身體係出現咗啲毛病,免疫力差咗,前排我有咳同喉嚨痛,我仲驚自己係流感,好在係感冒,不過都食咗十幾日抗生素先好番。」

謹記要戒口

  最令Cally煩惱的是皮膚敏感,她續說:「中醫師話我個人好濕,搞到有皮膚敏感,我嗰啲係風疹嚟,同食物都有關係,所以我O依家唔食得酵母粉,例如麵包、餅乾全部都要戒,我已經冇食9個月。點知農曆年前諗住應節食件蘿蔔糕,一食完眼睛附近開始痕痕哋,隔咗一晚隻眼腫到開唔到,要睇中西醫治療、唞幾日先冇事,感恩呢件事唔係年初一發生,唔係就慘喇。」

朝早食水果

  現時她謹記要戒口,還要每天瞓足8小時和保持心境開朗。此外,她還有自己一套保健心得,她直言:「朝早起身先飲杯暖水,然後食啲維他命,跟住我會食晒一日要食嘅水果,如食一個蘋果或一個雪梨,再加一個奇異果,鍾意嘅會食多半個木瓜,隔一陣就會飲碗熱湯,青紅蘿蔔、木瓜雪耳同西洋菜湯都好啱呢個時候飲。」

每天運動10分鐘

  如果她知道工作行程密到冇時間食飯,她還會食完早飯才外出,「如果朝早8點出門口,我會食埋先,都係食蒸豆腐炒條菜送飯,咁嗰日就夠體力做嘢,夜晚返到屋企有時會飲碗湯,但通常唔食,跟住快啲瞓等第二日早啲起身食,咁樣比較唔會肥。」加上她每天花10分鐘做自己改良的健體操,她表示:「我喺網上見到人哋做,我自己再去改良吓啲動作,隨時做都得好方便,都係拍吓手同伸展四肢嘅運動。」難怪Cally一直都keep到咁fit!

撰文:李佩儀

攝影:李維隆

其他文章
林偉 阮兒渴望新嘗試 白雲唔驚死最愛刺激玩意

最近在TVB劇集《鐵探》中有驚險演出的白雲,即將到台灣拍攝旅遊節目《3日2夜》,她表示...

hd