首頁 日報娛樂

帶老婆拜年又亂講嘢 陳志雲鬧鄧健泓唔用腦

11/02/2019
■鄧健泓同老婆齊同陳志雲食素盆菜開年。
■鄧健泓同老婆齊同陳志雲食素盆菜開年。(1/6)

        鄧健泓(Patrick)最近被影到帶埋昔日「定情愛犬」密會舊愛李施嬅,不過,Patrick深得老婆石詠莉(Sukie)信任,兩人一於好少理。趁住新春佳節,Patrick帶埋老婆向舊Honey陳志雲拜年,三人齊食素盆菜開年。重提當年Patrick曾以「Honey」稱呼陳志雲成為笑柄,Patrick澄清說:「其實當日我只係形容陳志雲係蜜糖,唔係叫佢Honey。」大師沒好氣說:「蜜糖有太多含意,仲以為自己講得好好,其實挖個窿俾自己踩,激氣。」

時至今日,Patrick對「蜜糖論」仍然耿耿於懷:「當時未公開李施嬅戀情,冇理由用蜜糖形容佢,餘下得蜜糖同檸檬我揀,我揀咗蜜糖形容陳志雲,因為蜜糖有療傷功效,有段時間我好坎坷,陳生接我返TVB,令我行番條正常跑道,所以好感恩。」陳志雲即說:「咁梗係揀檸檬啦,維他命C嘛,用蜜糖梗係錯到不得了,我都估到會點寫啦。」Patrick見過鬼怕黑,不敢用蜜糖來比喻老婆,志雲大師笑住反問:「係咪因為我,所以唔肯再用蜜糖嚟形容Sukie?噢!我唔要成為第三者,就算做,男方都唔會係鄧健泓,你睇吓佢,成個苦瓜乾咁,同佢通電話,佢永遠係憂鬱男,輸咗身家咁。」

  當日的素盆菜有素鮑魚、素雞、素蝦、素鴨及素海參,問到用乜食材重新形容陳志雲?鄧健泓衝口而出說:「佢個樣keep得咁青春,梗係防腐劑啦!」搞到陳志雲反晒眼,「人哋齋菜天然冇防腐㗎,你可唔可以用吓腦先發言啫?」最後在陳志雲指引下,Patrick用罕有及珍貴的髮菜形容大師,揀蝦(哈哈笑)去形容老婆,陳志雲指Patrick如鮑魚可塑性好高,要用汁慢慢熬才入味,要有耐性,去接納及呵護他。陳志雲總括說:「其實佢用乜嚟形容我,就算係糞便都冇問題,每樣嘢世間都有存在價值同意義,在乎我喺佢心目中地位無可取替。」鄧健泓自爆視陳志雲如大哥:「我屋企冇男人,所以好尊重佢,佢真係幫到我好多,我會記喺心。」

採訪:方騫平 場地:大自然素食

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd