首頁 日報娛樂

《鐵探》演出獲激讚 姜皓文直認恨攞視帝

12/04/2019
■黑哥話一直想演舞台劇,希望未來有機會挑戰,到時有望攞埋大滿貫。
■黑哥話一直想演舞台劇,希望未來有機會挑戰,到時有望攞埋大滿貫。 (1/8)

  黑哥姜皓文上次拍完劇集《守護神之保險調查》已覺唔夠喉,再遇着最近推出的《鐵探》,不單止劇本同角色都好,仲有惠英紅等好戲之人,當然要再拍。講到被網民激讚跟盧宛茵母子情戲份,黑哥話睇劇本已眼濕濕,知對手後都估會有火花。對於有望憑該劇爭視帝,他坦言恨攞獎,仲話同惠英紅一樣想挑戰埋大滿貫。

撰文:杜淑霞 攝影:李維隆

髮型:Jove Shek@La Md Salon

化妝:Herrylaiming Make-Up 服裝:Degaia_HK

  黑哥話一直想拍多啲劇集,「依家劇集質素同拍電影分別唔大,但喺個角色度耐啲,係好大嘅挑戰,上次《守護神》得3集真係唔夠喉,今次30集過足戲癮,仲有可以拍住紅姐佢哋,真係好興奮。」不過角色「Bingo」游走於黑白兩道,兩邊不是人,令他好大壓力,「拍時keep住喺唔開心狀態,好彩太太(殷寧)習慣晒,加埋家傭姐姐同埋5隻狗,佢哋7個係我嘅開心果同精神支柱,見到佢哋就減到壓。」

望挑戰埋大滿貫

  今次繼電影《翠絲》後再跟紅姐合作,黑哥話一樣好玩,「上次我哋做夫妻,今次係上司下屬,衝突更多更大,啲戲你來我往又係另一種好玩。」講到跟盧宛茵的母子情戲份被網民激讚,黑哥坦言睇劇本時已睇到眼濕濕,「其實知道對手後都覺得應該好有火花,雖然同Madam Lo(盧宛茵)初次合作,仲要唔係拍咗好多日就拍嗰場戲,但佢嗰份強烈嘅母愛,好自然感動到我喊出嚟。」談到演技大爆發,有望繼影帝後,跟紅姐雙雙再提名視帝視后,他笑言同紅姐再拖住行紅地毯感覺應該唔錯,「有機會都想攞視帝㗎!我都想好似紅姐一樣挑戰埋大滿貫,自己好想試吓演舞台劇,但可惜有幾次機會演,但都係遷就不到時間。」

其他文章
林偉 阮兒渴望新嘗試 白雲唔驚死最愛刺激玩意

最近在TVB劇集《鐵探》中有驚險演出的白雲,即將到台灣拍攝旅遊節目《3日2夜》,她表示...

hd