首頁 日報娛樂

跟安仔Eason撞聲 劉浩龍笑徐濠縈認錯老公

16/04/2019
■師兄好避忌,隻字唔提感情事。
■師兄好避忌,隻字唔提感情事。(1/6)

        劉浩龍(師兄) 聲演的動畫《女皇哥基大冒險》將於復活節上映,對於首次聲演動畫,師兄覺得幾開心但又好有難度,佢足足用咗45分鐘先搵啱把聲配音。講到自己把聲,師兄話同偶像許志安及陳奕迅撞聲,連「Eason嫂」徐濠瀠都試過認錯佢係老公,好搞笑! 採訪:方騫平 攝影:李維隆 場地:港威酒店Three On Canton

        在動畫中,劉浩龍聲演失寵小狗查理,成日諗計仔趕走女皇最得寵的哥基歷斯:「係一套好輕鬆同鬼馬嘅動畫,查理唔係奸到出汁,只係用計謀,使吓橫手鞏固番自己地位啫,奸得嚟唔乞人憎,我只係對住歷斯就奸奸哋,平日對住人都係一隻好可愛嘅小狗。不過,最後被篤爆係小奸狗時好似走火入魔咁,導演要求我盡量放開奸笑,要幻想好瘋癲,真係有少少難度,呢個係最難忘嘅場口。」

  第一次配音嘅師兄對配音好有興趣:「我同其他歌手一樣,由細到大都鍾意玩自己把聲。以前拍谷德昭同莊文強嘅戲,我都係自己配番音,《女皇哥基大冒險》導演話好記得我把聲,所以搵我做。其實我把聲都好易認,有次我坐的士,當我講完要去嘅地點,司機就聽得出係我,都覺得幾開心。」師兄坦言自己把聲同安仔及Eason好似,「大家都係一啲中音嘅人,我試過打畀徐濠縈,阿徐竟認錯我係佢老公!(鄭秀文有冇誤會你?)我好少打畀Sammi,所以未試過有呢個誤會。 (下次一齊配?)唔得,咁成套戲咪唔認得邊個打邊個?呢個組合係唔會成功,所以有你冇我。」

  目前師兄專心拍戲及做健身,keep住有副好body,「有人話我瘦都ok,因為成世人都被叫肥龍,由小學開始未試過買28吋腰褲,依家可以着到細碼衫,所以唔好改變。」問係咪寄情工作及運動?單身嘅師兄話:「唔答!」

其他文章
天佑《尋常心》大膽演HeHe 梁祖堯感激秋生助陣 成夢幻組合

  舞台劇百花齊放,近年吸引唔少影帝影后級人馬踏上舞台親親戲迷。最近「風車草劇團」將美國得獎舞...

hd