首頁 日報娛樂

為女搏命 烈日當空打到癲 陳展鵬筋骨勞損成身傷

23/04/2019
馬步好穩
拍過唔少動作場口又同過甄子丹合作拍打戲嘅展鵬,馬步相當穩健。
馬步好穩 拍過唔少動作場口又同過甄子丹合作拍打戲嘅展鵬,馬步相當穩健。(1/10)

        兩年多前陳展鵬(煎pang)憑藉文偉鴻監製嘅《城寨英雄》拳佬一角封視帝,新劇《唐人街》幾乎用原班人馬上陣,展鵬在新劇繼續以八極拳出擊,仲愈打愈甘。日前,烈日當空下展鵬在民初街拍攝一場奮不顧身拯救姚子羚的場口,佢赤手空拳以一打五,拳拳到肉,完全唔錫身。冇計,剛為人父,B女「小豬比」Quinta啱啱出世,趁住42歲仲有心有力,煎pang搏晒老命使出真功夫,希望帶來更多工作機會去賺奶粉錢!他笑說:「多咗一個人食嘢,我就要更加努力去工作啦。」

據知,新劇中嘅展鵬日日開工都要打,不過他愈打愈起勁,拳腳功架打得愈嚟愈靚,監製都讚Good。探班當日,要以一敵五的展鵬表現出色,埋位前他會主動同武指度新招,又好嚴格咁要求多次試位然後用心操熟。一開機就即嚟料,勢兇夾狼地穩紮馬步,面容扭曲兼快狠準出拳、叉頸、摔撻、批月爭,乾淨俐落,分幾鐘就掃低對手。幕後爆展鵬為求效果好,堅持盡量親身上陣,唔使用替身,不過,劇組好錫住呢位新任老竇,必定係安全情況下拍危險動作,唔使單文柔擔心。

靠老婆湯水補身

  49歲剛為人父的鄭嘉頴最近亦頻出event賺奶粉錢,展鵬後生啲,仍然有心有力就打出真功夫:「我唔係科班出身,但由出道開始經常拍動作片,好幸運曾經同過猛人好似甄子丹、于榮光及周比利拍過打戲,見識過乜係功夫,佢哋加強咗我嘅功夫基礎,希望今次喺觀感上帶畀觀眾新鮮感。」提到愈打愈勁,展鵬坦言拍得幾辛苦,「尤其有high speed,受傷一定有,要有硬食落去嘅反應先好睇,一個short咁直落拍,要同對手夾準晒啲鏡位,記錯招式好易畀對手兜槌打面。最初頭兩個月拍到筋骨勞損,所有舊患出哂嚟,手、腳、膝頭都傷晒,搞到個個都好擔心。做得呢行要全程投入,觀眾係會睇到我有幾盡力,對自己嚟講係有交代。因為場場有我,開工至今冇休息過,有時都好擔心體能下降,好彩單文柔提供湯水食療補充返,拍得都叫順利。」

自爆食老婆餸尾

  「小豬比」Quinta剛剛出生,「愛妻號」煎pang忙中抽空去醫院陪產及剪臍帶:「口依家最緊要係佢情緒要開心,身體要健康,現階段冇嘢辛苦得過單文柔,除咗拍劇,所有休息時間畀晒佢,每日安排晒雞湯、豬骨湯、海蔘等營養坐月餐,佢飯餐有四餸一湯,一個人食剩好多餸,唯有我包尾,帶佢食剩嘅嘢返公司食,跟同事一齊分享,我要食隔夜嘢無問題,好嘢梗係畀佢食先,等佢吸收更多營

養嘛。」

採訪:方騫平

攝影:張詠森



其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd