首頁 日報娛樂

谷底翻身新公司當寶 天堂鳥做運輸捱過低潮期

24/04/2019
■解決合約問題後Gordon、Lincoln、Tyrese(左至右)一身鬆晒。
■解決合約問題後Gordon、Lincoln、Tyrese(左至右)一身鬆晒。 (1/6)

  男子組合天堂鳥三位成員葉灝基(Gordon)、許俊豪(Lincoln)及歐喬鋒(Tyrese)與前公司因合約問題糾纏兩年半終告一段落,三人「重生」後加盟天盟娛樂,新公司當三人係寶,隨即派新歌《故作瀟灑》,更宣佈將於今年11月26日於九龍灣Star Hall舉行成軍以來第二次演唱會,紀念出道5周年。採訪:方騫平 場地:Chill Café Bar&Grill

  天堂鳥出道作《登陸太陽》當年被網民洗版,雖然行MK POP路線,但有人笑亦有人鍾意,只得4首歌都夠膽喺九展開兩場演唱會,更因為唔夠歌,一首歌唱足5次成為熱話。其後因為合約糾紛,三子由天堂跌落地獄,冇Job、冇錢、冇自由。講返呢兩年多嘅狀況,三人苦不堪言,Tyrese說:「呢5年嚟經歷高低,有困難時候,低潮時學懂嘅嘢比幸運時多,尤其呢兩年多官司期間,大家一直為生活費用好擔憂,我哋為生活費返內地酒吧做商演,凌晨駕車送貨,真係唔享受加唔好受,所以可以喺呢行做到鍾意嘅嘢,更加感恩同珍惜,o依家有固定收入,雖然唔叫多,但唔使揸貨車,可以專心為香港樂壇做多小小嘢。」

  Lincoln好認同隊友,「我有幫Tyrese運貨,又幫開網店朋友交收貨物,諗返為Keep住組合都幾悽涼,幾辛酸,怕屋企人擔心。」Gordon亦說:「呢段時間除我哋三人唔開心,屋企人亦好擔心,都多謝佢哋畀我繼續追夢。」他又承認當日在壓力下三子有唔少拗撬,好彩大家肯鬧交,肯坦白講出感受,否則好難KEEP住團火。Lincoln笑說:「今次捱得住就唔會散。」

  重新出發的天堂鳥坦言會加把勁追返錯失的時光,Tyrese說:「目前我哋經已有16首歌,預計開到演唱會時有20首歌,加埋一啲鍾意嘅歌曲,向經典組合致敬,我都唔介意搵埋緋聞女友林欣彤做演唱會嘉賓,大家係朋友,唱歌玩音樂啫。」

其他文章
如個人音樂回顧展 蘇永康首個中樂伴奏演唱會

蘇永康(阿公)將於6月21日及22日假紅館舉行「All That Jazz (&Pop...

hd