首頁 日報娛樂

6月着龍袍 澳門「登基」 薛家燕搵初哥哥Chilam上台見證

26/04/2019
■家燕姐展開巡唱,除了6月澳門站外,嚟緊仲有中山、東莞、美加及星馬等地。
■家燕姐展開巡唱,除了6月澳門站外,嚟緊仲有中山、東莞、美加及星馬等地。 (1/6)

  薛家燕去年化身「Captain Nancy」在紅館《薛家燕愛你無限60年演唱會》中載歌載舞,近日食正Marvel新片條水,將於6月29日再出動,假澳門金光綜藝館對付「壞人」,亦係家燕姐世界巡唱的第一站。家燕姐笑說:「雖然Captain Nancy深入民心,但我唔會畀佢搶晒鏡,到時我會着龍袍,襯埋千萬鑽飾隆重『登基』,希望佘詩曼同張智霖喺現場見證!」        採訪:方騫平

  之前家燕姐到澳門出席「香港工展會‧澳門」活動,獻唱金曲及大跳十字步為澳門個唱作預演。最搞笑係同場的工展小姐亞軍麥麗怡同家燕姐新抱仔Zoe撞樣,家燕姐大笑說:「都有小小似,不過我新抱細粒啲。」

  講到澳門演唱會,梗係唔少得「香港製造」的Captain Nancy啦,家燕姐笑說:「佢發揮到希望及鼓勵作用,聽講學生哥考DSE、小朋友對戰要砌低對方,甚至買唔到鄭秀文演唱會門票,都話要搵Captain Nancy!真係好好笑,Captain Nancy會接拍廣告,o依家我好似明蝠俠咁多咗一個身份,不過,我早已註冊,好穩陣。」

  作為精神支柱,家燕姐可會鼓勵一下近日受到困擾的鄭秀文?她真心說:「我同佢唔熟冇乜交往,不過有人都認咗錯,Sammi亦話願意寬恕,件事叫做平息咗。我係有經歷嘅人,家和萬事興,最緊要皆大歡喜。所以,澳門騷要開開心心,到時我會揀選一班fans上台跳十字步,仲有仔女同台演出,另外,又力邀佘詩曼和張智霖做表演嘉賓。澳門對我好有情義結,尤其10多年前同阿佘、Chilam拍過《十月初五的月光》,前年又拍電影延續,好有親切感。」

其他文章
如個人音樂回顧展 蘇永康首個中樂伴奏演唱會

蘇永康(阿公)將於6月21日及22日假紅館舉行「All That Jazz (&Pop...

hd