首頁 日報娛樂

努力自療 拍外景搵位唞氣 馬國明笑言食得瞓得乜都OK

02/05/2019
離群唞氣
劇組轉景時,馬明獨自行去涼亭位唞氣。
離群唞氣 劇組轉景時,馬明獨自行去涼亭位唞氣。(1/12)

        「安心偷食」事件發生半個月,被封為「絕世好男人」的馬國明早已收拾心情如常開工拍新劇《降魔的2.0》。上周四晚深夜11時,馬明現身山頂拍攝外景,戲內投入好少NG,戲外只要有數分鐘等候時間,馬明都會離群靜一靜,最鍾意摸黑行入無燈光小路眈天望地,搵個私人空間唞啖氣!正如鄭秀文話齋:「要誠實面對在這過程中偶爾衍生的情緒感受,這是必須的過程,沒有捷徑啊。」馬明亦強調自己乜都OK,食得瞓得,大家唔使擔心佢。

        隨着黃心穎於4月26日避走美國洛杉磯,「安心偷食」事件終告暫緩。暴風雨過後,心中放晴的鄭秀文選擇勇敢面對,迎接藍天來臨!而馬國明在事件之始亦大膽走出嚟表達內心感受,強調由嬲變到擔心,坦言「嚟緊我都會好專心我嘅工作,我會繼續拍好我嘅戲,其實我仲開緊工嘅,我唔希望影響呢部戲嘅進度。」馬明無吹水,心穎出事後日日寄情工作,亦為自己打氣,在社交平台上載一張開工自拍照並留言:「繼續,努力工作」。

行埋一邊若有所思

  上周四晚,馬明要拍攝一場跟黃智雯帶住何遠東個「龍貓仔」上山捉精靈的戲份,因為童星不能收太夜,劇組要盡快趕工,馬明及黃智雯非常專業,甚少NG,而「龍貓仔」要花較多時間,拍完又拍。一直企喺鏡頭外Stand by的馬明等等吓突然離群,獨自向瞭望台行去,沿途漆黑一片,只見佢沿路眈天望地,若有所思,匿埋唞啖氣後,馬明好快折返歸隊,無影響拍攝進度。記者所見,馬明較以往沉默,唔使埋位時只會呆企一邊,或者撳電話,及望住個無畫面的「playback芒」,黃智雯見狀亦不敢上前打擾。轉景時,馬明又獨自行去附近涼亭中靜思,空氣瀰漫憂傷感。

努力搵錢先最實際

  問馬明係咪刻意行開唞吓氣,佢再三強調自己無嘢:「唔係行開避靜,只不過未去過嗰忽,行過去望吓啫,我冇嘢,邊有嘢啫,ok喎,心情ok,乜都ok,食得瞓得,所有嘢都正常,拍感情戲都冇問題,哈!有咩問題呀?點解你會咁問嘅?(咁感情生活呢?) 正常,總之我開工正常,所有嘢都冇回應喇,講乜都俾人寫,唔好畀話題人寫。(你之前張的士車廂自拍好悴憔喎!) 我特登影到自己瘦啲嘛,哈哈,我冇嘢。」

  再問馬明係咪寄情工作,馬明腦筋清晰,笑言「日日都要正常開工㗎啦,套劇都未拍完。」他更自爆《降魔的2.0》拍多個幾月便煞科,之後唔會攞假再緊接拍新劇:「公司叫開劇咪開囉,我一向有劇就拍,冇乜特別。快啲過咗件事就算啦,搵錢最實際。(實際過愛情?)咁要食飯㗎嘛。」而黃智雯亦大讚馬明係專業演員,即使兩人拍感情戲都冇問題。

採訪:方騫平 攝影:李權威

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd