首頁 日報娛樂

單身20年 三類男人禁埋身 鄧萃雯對第三者絕不啞忍

09/05/2019
■雯女坦承現實冇拖拍,靠演戲一樣可以滿足到,同拍檔陳錦鴻想法一致,「好似我未試過結婚,今次套劇都可以體驗到某部份。」
■雯女坦承現實冇拖拍,靠演戲一樣可以滿足到,同拍檔陳錦鴻想法一致,「好似我未試過結婚,今次套劇都可以體驗到某部份。」(1/9)

        呢個年代過40歲未嫁,被批「盛女」,50歲仲未婚,會畀人話失敗,但最近相隔6年為ViuTV拍劇《婚內情》演啞忍老公有外遇的「馬淑湘」、53歲的鄧萃雯完全唔認同。單身近20年的她認為,婚姻唔係戀愛墳墓,對愛情有追求唔等如失敗者,佢對揀對象仲相當嚴格,講明「三觀一定要接近,會降低我生活質素嘅對象,唔會諗啦!」所以冇獨立經濟能力同幼稚嘅小鮮肉就一定唔合格,習慣咗一個人嘅雯女,仲話絕對唔會為咗搵對象走去相睇,深信總會等到Mr.Right出現。

        已有6年冇拍港劇的雯女,今次答應拍《婚內情》原因其實好簡單,「我冇話唔拍港劇㗎!最緊要主題有興趣,我一直鍾意拍講情嘅戲,無論係親情、愛情定係友情都好;其次就係力所能及,演到同體力應付到嘅;同埋真係好耐冇用廣東話演戲,自己都掛住,成日出街遇到影迷都會問『幾時返嚟拍劇呀?』,雖然喺內地拍嘅劇,都會喺香港睇到,但配咗音就唔同晒啦!仲有想有完整劇本,不過香港真係難啲,今次都係睇咗故事大綱,講真自己呢個年紀,都唔知仲有冇機會再拍愛情劇,咪博一博囉!」

婚後仍要愛情

  劇中雯女演的畫廊老闆娘「馬淑湘」,跟陳錦鴻演的作家老公「孫逸」結婚20年,表面上相當恩愛,事業愛情兩得意的她,實則明知老公有婚外情而選擇啞忍。強勢的雯女現實中未必如「馬淑湘」啞忍第三者,但她慶幸唔使再演強者角色,「近年大家睇得多我做話事嘅人,今次係一個好大反差,其實幾成功嘅人,都有佢失敗嘅一面。」09年及10年憑《巾幗梟雄》及《巾幗梟雄之義海豪情》冧莊做視后的雯女,事業一帆風順,不過感情生活卻交白卷,99年跟鄭敬基分手後,未有公開過戀情,不過雯女唔認為是失敗,「未搵到適合嘅對象唔等如係失敗,我有啲朋友結咗婚亦唔一定開心,如果好似『馬淑湘』咁樣嘅婚姻,係咪都叫成功呢!?其實感情事真係要當事人先知,佢付出啲乜嘢,佢嘅選擇外人未必明白。但我期望嘅婚姻,係仲有愛情喺度,唔係老夫老妻,就變成親人。」

信有Mr.Right

  雯女承認仲想搵個伴,但有要求亦唔心急,「首先三觀一定要接近,會降低我生活質素嘅對象,唔會諗啦!因為我到咗呢個年紀,好習慣一個生活,我去旅行、睇戲、食飯自己一個都冇問題,但如果要我再適應一個人,要好值得先得囉!況且我好早已放棄咗生BB嘅諗法,更加唔急去搵對象。」劇中雯女會跟演醫生的林德信,發展一段姊弟戀情,但她認為現實中較難,「小鮮肉?20幾歲嗰啲肯定唔得,真係溝通唔到,同埋仲要幫佢籌謀經濟同事業嘅嘢,我又要keep得好辛苦,真係幾難㗎!其實大我太多都唔多適合,如果大10年即係60幾,佢經濟同生活打算又好唔一樣。」聽落對象真係唔易搵,不過雯女冇諗過靠相睇,「speed dating或者相睇都好尷尬,同埋真係要相處過先得嘅,我同祥仔(黎耀祥)兩夫婦都傾過,話搵粉絲得唔得呢?起碼一定會好欣賞我,但中國人社會,個女人名氣大過你,你係鄧萃雯老公一般男人未必接受到,男演員可能易啲。」但她仍相信有Mr.Right存在,「我有啲朋友明明對方唔係鍾意嗰類型,但係遇到就會知係呢個人。」

撰文:杜淑霞

攝影:李維隆

髮型:Nichol Yip@HAIR

服裝:MARELLA

場地:香港觀塘帝盛酒店

其他文章
如個人音樂回顧展 蘇永康首個中樂伴奏演唱會

蘇永康(阿公)將於6月21日及22日假紅館舉行「All That Jazz (&Pop...

hd