首頁 日報娛樂

三代同堂 溫馨賀母親節 胡杏兒3年抱兩 奶奶錫到燶

15/05/2019
養胎增磅
■薄施脂粉嘅杏兒全身圓潤,要多謝奶奶啲補品喎!
養胎增磅 ■薄施脂粉嘅杏兒全身圓潤,要多謝奶奶啲補品喎!(1/7)

        39歲嘅胡杏兒15年嫁畀沙頭角禾坑村客家有米原居民李乘德(Philip)後,前年一索得男,生咗寶貝仔李奕霆(Brendan)後,今年1月再宣佈佗B喜訊,Brendan將榮升哥哥。剛過去嘅母親節,本報就直擊杏兒在奶奶傍實下帶埋B仔行中環。見奶奶繞實新抱照顧有加,笑笑口等7月再抱孫呀!

        屬「高齡孕婦」嘅胡杏兒,婚後積極造人,結果17年10月為丈夫誕下慈菇椗,今年1月底再公告陀豬寶寶,三年抱兩。當年杏兒佗住Brendan,奶奶燉補品畀佢養胎又煮新抱喜歡嘅餸菜,現在同奶奶一齊住,老人家又會幫手湊孫,婆媳關係超好。大肚杏兒對腹中baby性別保密,但好友梁詠琪卻送咗一堆藍、白和粉紅色衫仔,網民紛紛猜測杏兒佗B女,戥佢湊成「好」字送上祝福。但杏兒上周現身活動時強調:「BB嘅性別要7月生咗先公開,暫時只有屋企人知道。」

  日前周末下午4時,懷孕逾7個月嘅杏兒挺巨肚,由奶奶孭住寶貝孫Brendan,加埋工人及親友等一行6人,全女班現身中環慶祝母親節。薄施脂粉嘅杏兒在奶奶陪同下先一齊歎茶,其後再去太子大廈shopping。一行人在玩具及精品店買嘢,見杏兒隨手拎咗枝鬼口水睇,似想買畀小王子玩;奶奶則睇吓小背包。逗留幾分鐘,大肚杏兒發現有記者,似怕奶奶上鏡即通知眾人離開,佢亦識做向記者友善微笑揮手say bye,同時間女親友手抱Brendan急步鬆人。落到地面,奶奶細心繞實大肚新抱,再慢慢行上七人車離開。

採訪 : 張詠森

其他文章
如個人音樂回顧展 蘇永康首個中樂伴奏演唱會

蘇永康(阿公)將於6月21日及22日假紅館舉行「All That Jazz (&Pop...

hd