首頁 日報娛樂

發掘關西新玩法 周奕瑋同師奶鬥搶蝦

17/05/2019
■吞拿魚主題公園有得玩又有得食。
■吞拿魚主題公園有得玩又有得食。 (1/6)

  去年周奕瑋(Jarvis)主持的《周遊東京》成為民選「最受歡迎綜藝節目」,亦攞到TVB其中一個「最佳非戲劇節目」獎,連鄭裕玲都讚好睇。相隔半年,Jarvis再推新作《周遊關西》,雖然大阪及京都是港人熱門旅遊地方,但佢唔怕接受挑戰,認為有啲地方,唔同時間就有唔同玩法,打算去關西玩的讀者要留意嘞。採訪:方騫平

  對於首次走出東京做旅遊節目,Jarvis坦言有壓力但又覺得好有新鮮感,「依家大阪人都向南玩,南邊有個城市叫堺,較少遊客會去,有好多正嘢,好似有新開嘅吞拿魚主題公園,有得睇劏魚騷,即劏大拖羅壽司一盒6件只要1500日圓(約107港元),價錢平過黑門市場好多,仲可以競投魚頭。」

  Jarvis介紹到停唔到,佢話玩完吞拿魚主題公園仲可以搭車去二手百貨公司,「兩層高嘅百貨公司全部賣二手名牌貨,衫褲鞋之餘仲有結他,兼有專業鑒證師駐場保證買得安心,就算睇漏眼,只要證明到係假貨都會全數賠償,我用咗千幾蚊港幣買咗件60年代名牌大褸,又買咗領呔俾爸爸,係當年原價三份一價錢,喺天王寺站有路面電車搭25分鐘就去到堺,總站對總站落車,二手店就喺附近。」

  今輯周奕瑋繼續搵著數:「我好鐘意睇師奶攞著數,今次去枚方,火車站隔離有個超市,每個月都有『超抵放題』,有新鮮大蝦、麵豉湯包、水果及白米等任拎,由500至1000日圓,只要袋滿個袋唔好跌出嚟就可以攞走,時間不限,最勁可以賺到物價6倍。」Jarvis介紹得當然亦有搶埋一份,「我同師奶去搶腸仔同大蝦,師奶好有策略,置身其中好好玩。」

其他文章
天佑《尋常心》大膽演HeHe 梁祖堯感激秋生助陣 成夢幻組合

  舞台劇百花齊放,近年吸引唔少影帝影后級人馬踏上舞台親親戲迷。最近「風車草劇團」將美國得獎舞...

hd