首頁 日報娛樂

鄧建明監製校長作曲 湯寶如落重本推廣東新歌

17/05/2019
■湯寶如同Joey Tang一坐埋就不斷開心話當年。
■湯寶如同Joey Tang一坐埋就不斷開心話當年。 (1/6)

  已經上咗岸的湯寶如(湯記)繼兩年前自資推出廣東新歌《獨愛》回歸樂壇後,最近再自掏腰包灌錄由校長(譚詠麟)作曲、梁栢堅作詞,講大愛的新歌,湯記更請來太極樂隊成員鄧建明(Joey Tang)做監製,然後Joey拉埋他的師傅,資深唱片監製葉廣權幫手做混音,有一個殿堂級組合做back up,湯記好大手筆呀,湯記坦言雖然唱咗29年歌但唱歌熱情不減:「唔唱歌感覺好辛苦,會手痕。」採訪:方騫平



  當日Joey Tang在張敬軒的錄音室迎接湯寶如,雖然首次幫湯記做歌曲監製,但兩人識咗多年一啲都唔陌生,Joey更爆被湯記鬧過:「我幫佢做《獨愛音樂25周年演唱會》band leader,當時有小小摩擦,佢怪責我編亂咗嗰part四大天王串燒歌,搞到佢好難唱,所以之後改得好緊要,當時我仲諗『死啦,咁樣不如唔再撈啦!』不過,我都好體諒,因為湯記好耐未唱過,難免有壓力。」對此,湯記一臉茫然,笑笑口反問:「係咩?我有講過咩?我真係唔知呀,算啦算啦,都過咗去,向前望。」

  前事不計,湯記更給Joey高帽:「我由細睇到佢大,佢嘅《每一句說話》、《留住我吧》真係好好聽。」兩人又話當年,慨歎昔日香港樂壇好蓬勃,Joey說:「當年我係華納,你哋寶記(寶麗金),我哋成日險中求勝,有年仲憑《每一句說話》攞『最喜愛的本地創作』獎。」湯記說:「當年寶記連續8年攞樂壇班霸,百花齊放,大家好開心有良性競爭,好懷念嗰時。唉,o依家我都未決定會唔會出實體碟,邊度仲有唱片舖?香港樂壇好慘淡。」

  對於Joey任監製,湯記大讚平靚正,「每隻歌預5位數字使費,唔好諗收入先,我好鍾意音樂,為咗理想就唔好諗咁多嘢喇,要享受過程,負擔得到就去做想做嘅嘢,冇可能成日唱番以前啲歌,咁樣好悶啫,如果我再唔唱,香港樂壇就冇歌㗎嘞。」

其他文章
天佑《尋常心》大膽演HeHe 梁祖堯感激秋生助陣 成夢幻組合

  舞台劇百花齊放,近年吸引唔少影帝影后級人馬踏上舞台親親戲迷。最近「風車草劇團」將美國得獎舞...

hd