首頁 日報娛樂

心情超好 拍外景瘋狂搞搞震 馬國明暗示同心穎已分手

24/05/2019
成日傻笑
■拍完《降魔的2.0》,放兩個月假先再拍新劇《使徒行者3》嘅馬明心情非常好,埋位前成日笑,仲不斷整鬼同劇演員。
成日傻笑 ■拍完《降魔的2.0》,放兩個月假先再拍新劇《使徒行者3》嘅馬明心情非常好,埋位前成日笑,仲不斷整鬼同劇演員。(1/9)

        「安心事件」曝光後,馬國明經過個多月沉澱,「內傷」已完全康復,心情愈來愈好,日接夜趕拍新劇《降魔的2.0》依然識講笑。日前零晨時份,馬明喺西貢園藝農場拍外景,等埋位期間如開籠雀勁多嘢講,講到明呢刻要努力搵錢,搵得愈多就愈好,因為有錢才有安全感!問到是否覺得男人有錢才會有女人?他說:「唔關事,錢係要嚟保障自己,為咗錢而撲過嚟嘅女仔要嚟冇意思。」更坦言之後搵女朋友,絕定唔會搵港女,暗示同心穎已分開。

被指周身名牌貪慕虛榮、一心釣金龜的黃心穎敗走美國「避世」,馬明則寄情工作,趕拍新劇《降魔的2.0》。暴瘦及憔悴過後,馬明已回復狀態,日前在西貢通宵拍外景時,幽默感返晒嚟。當天場口講馬明及胡鴻鈞(Hubert)等合力打怪獸拯救謝雪心,開通宵無得瞓,但馬明全程Hyper,又同演員玩自拍,動作多多鬼咁精神,仲笑得好大聲,勁風騷。例子一有,他跟戲中媽媽心姐講笑,話自己踎低扶住心姐呢個動作,鏡頭擺位關係會令人誤會同阿媽「打茄輪」。

放假忙去驗車續牌

例子二係當等拍打戲時,馬明見傳被TVB雪藏嘅胡鴻鈞有替身,即無限取笑Hubert,講到Hubert都有啲唔好意思,馬明大笑說:「你就好啦有替身,做歌星受力捧,我都有替身……衫!哈……」Hubert尷尷尬尬,只好回答:「承你貴言!」等馬明收口,好搞笑。不過,笑還笑,馬明真係好用心,一埋位就好專業,完全熟讀劇本。問到馬明係咪已放低包袱?他繼續避談更將話題扯到去地球另一邊:「終於拍完套劇好開心呀,好似完咗一件事咁,其實我日日都咁開心喎,我去睇車嗰陣仲開心呀,就算唔買睇吓都好呀。我好鍾意車,兩部座駕好似老婆咁,拍完呢套劇會親自帶佢哋去驗車同搞續牌,從來都係親力親為,唔會假手於人,搞完車咪留喺屋企睇波,唞吓,冇打算外出。」

講明唔要貪錢港女

        被封為娛圈清泉好男人,零負評男神,馬明只當笑話,係虛火,對工作冇乜幫助,搵錢才最實際:「喺TVB搵得幾多呀?希望有多啲搵錢機會,就算有車有樓,再賺錢嚟買車、買樓,買乜都好,要有生活保障,大佬呀,成家人要我養,我好大壓力㗎,再唔搵就全家仆直喇,(係咪體會到男人有錢就有女?)有錢先撲埋嚟就冇意思,我年紀唔細唔要港女。」問到日後想搵咩類型女朋友係咪要用情專一?馬明諗都無諗,「唔知,隨遇而安!」馬明表明唔要貪慕虛榮港女,更乘機澄清外間對他跟黃心穎的錯誤解讀:「有太多誤傳,一時話我留戀情侶公仔,繼續放喺車度;一時又話我除低情侶戒指,我想講所謂嘅情侶戒指只係登台飾物;所指嘅生肖情侶公仔只係吉祥物,因為黑色車要放紅色嘢,未拍拖前都有呢對公仔啦。」

採訪:方騫平

攝影:李權威

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd