首頁 日報娛樂

禁兩女睇新劇 陸永怕衰樣壞慈父形象

06/06/2019
■陸永扮鬼扮馬,現實竟係足不出戶宅男。
■陸永扮鬼扮馬,現實竟係足不出戶宅男。(1/6)

  陸永同C君精靈鬼馬,早前孖住做《Do姐去shopping》,o氹到鄭裕玲鬼咁歡喜。不過,陸永喺無線新劇《婚姻合伙人》中,未走歪路變衰前係做一個戇居宅男,傻頭傻腦,成日被林秀怡恰。陸永坦言勒令唔會畀兩個寶貝女睇到daddy樣衰一面,費事留下陰影:「我覺得宅男個造型相當核突,核突過我喺屋企嘅打扮,最怕囡囡見到爸爸喺劇入面做衰嘢,以為爸爸係壞人。」 採訪:方騫平

  劇中陸永同林秀怡係歡喜冤家,最後由仇人變情人,有一場講林秀怡浸浴時企圖自殺,陸永跳落個缸度加以阻止,鏡頭前着住內衣的林秀怡濕身透bra,32C上圍相當誘惑,但陸永竟然無留意,他說:「都唔係賣肉,呢場戲最深印象係拍得幾辛苦,我哋拍完換返衫時,原來大家發覺做得未夠好,決定提出再拍過。同林秀怡合作都好得意,佢係勤力演員,對自己有要求,咁就會有火花。有場夜戲要拍我哋一齊唱K,現場唔使收音,我哋就玩嘢亂咁唱,猛唱:『幾時先可以收得工?』氣氛好好,至少唔會有悶場。」

  講到他由宅男變不擇手段,走精面的壞人,陸永就話無難度:「我除咗個樣衰外,其實幾百搭,聰明、蠢、奸、宅男…都做得到,平日好少出街,會留屋企打機,本身偏宅,哈!我只係對住嘟姐口花花,因為同嘟姐好熟,而且嘟姐都係宅女,成日留喺屋企煲劇,我同佢搭飛機坐隔離,成程機唔使瞓,我哋由國家講到宇宙,所有嘢都討論,聽佢講都學到嘢。(有冇叫嘟姐捧你場?) 我唔敢咁要求,怕冇朋友做,佢只會答:『得鬼閒睇你,我自己嗰啲都未睇!』不過,佢會轉達佢朋友意見畀我聽,因為佢啲朋友都會特別留意農夫。」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd