首頁 日報娛樂

神隱32年 復出劇變收山作 景黛音呻太直 得罪人撈唔掂

13/06/2019
終極美魔女
■Flora姐被問到駐顏方法,竟坦白話:「我好懶㗎!唔做運動,又冇乜護膚,之前怕煩連頭髮都剪短嘛!淨係會煲吓湯飲,冇乜特別。」
終極美魔女 ■Flora姐被問到駐顏方法,竟坦白話:「我好懶㗎!唔做運動,又冇乜護膚,之前怕煩連頭髮都剪短嘛!淨係會煲吓湯飲,冇乜特別。」(1/9)

        ViuTV近期劇集都搵來不少有份量或難得復出的藝人演出,本周開始推出的《退休女皇》,搵來退隱32年,當年演《鹿鼎記》梁朝偉八個老婆之一「建寧公主」令人留下深刻印象、57歲的景黛音(Flora)復出擔正。 以美魔女姿態復出的Flora姐,講明最初只為跟韓團偶像合作,所以拍劇屬期間限定,令復出劇極速變成收山作,她更自爆當年只得25歲的她,毅然離開TVB退出娛樂圈嫁人生女,只因自覺性格太直易得罪人,完全唔適合在圈中生活,所以索性退出後神隱兼謝絕一切圈中人應酬及聯絡。

相隔32年再拍《退休女皇》,Flora姐話最初答應只因韓國男團SHINee成員泰民,「嗰時金生(金廣城)同我講有呢個劇個角色好啱我,但係我話除非搵到泰民做我個仔啦!點知佢真係一口答應去搵,我自己都有幫手透過Rain經理人嗰邊幫手聯絡,但係因為佢哋有日本巡迴演出加上鐘鉉自殺死咗,檔期冇辦法遷就到,雖然最終合作不成,但劇集已籌備得七七八八,同埋喺聯絡泰民期間睇得出佢哋係好有誠意嘅。」

讚姜濤似泰民

  講到冧泰民,Flora姐坦承最初受18歲的囡囡影響,「嗰時阿女將SHINee張海報貼咗喺我牀頭,我仲問佢『邊鬼個嚟都唔識』,後尾我開始留意佢哋,成日上網睇佢哋啲片,發覺泰民真係好正,又乖仔又努力,真係好欣賞佢,所以想同佢合作,但係我唔係會飛去韓國追星嗰種,就算佢嚟香港演出,我都未必會去睇。」雖然同唔到泰民合作,但Flora姐最終在《全民造星》揀咗姜濤演其囝囝角色,「嗰陣時姜濤仲參加緊《全民造星》,安排咗我同佢食咗餐飯,我真係覺得佢有小小泰民影子,唔多出聲咁,所以我揀咗佢,合作後覺得佢都幾乖,以新人嚟講演戲算交到功課。」Flora姐仲間接幫姜濤澄清遲到惡習,「嗰時拍嘢仲有人嚟問我,佢係咪成日遲到,但我又唔覺喎!」

想拍韓式真人騷

  雖然有32年冇拍劇,但Flora姐話冇乜唔適應,只是有啲蝦碌嘢發生,「有日收工心急返屋企唔記得除咪,其實都冇乜問題,今次個角色都唔算難應付,同埋我講明想同多啲未合作過嘅人合作,同埋我個人性格好直,唔順心唔會照做,有唔合理對白唔會照講,所以拍得幾開心。」不過她講明無意再拍劇,「因最初為咗同泰民合作先拍,其實我本身唔係太鍾意娛樂圈生活,否則都唔會25歲就退出咗,嫁人同生女啦!你見我咁多年都冇乜出嚟,連戚美珍同廖安麗佢哋搵我聚舊,她都冇參加過,有乜好傾啫!我個人真係好直㗎!好容易得罪人,又唔想講假話,咪寧願唔出嚟應酬,做朋友嘅嘢喺個心度就得㗎啦!」雖然唔想再拍劇,但直言10多年冇睇香港電視的她,對類似韓式真人騷卻有興趣一試,「拍劇除非同到泰民合作,我本身又冇乜戲癮,反而好似韓國嗰啲真人騷咁可以試,特別係有得旅遊又有得食嗰種呢!」

採訪:杜淑霞

其他文章
天佑《尋常心》大膽演HeHe 梁祖堯感激秋生助陣 成夢幻組合

  舞台劇百花齊放,近年吸引唔少影帝影后級人馬踏上舞台親親戲迷。最近「風車草劇團」將美國得獎舞...

hd