首頁 日報娛樂

《愛‧回家》繼續長拍長有 「大四喜」劉丹出外景好受歡迎

14/06/2019
■劉丹拎住道具銀紙,滿心歡喜。
■劉丹拎住道具銀紙,滿心歡喜。 (1/8)

  無線處境劇《愛‧回家之開心速遞》一直收視高企,但有指無線「縮皮」將停拍,TVB行政總裁李寶安強調:「荒謬之談,簡直係無中生有!」日前,劇中元老級主角劉丹就現身中環拍外景,早排丹叔喺劇中同「龍敢威」羅樂林等四人組成耆英組合「大四喜」,網友好like,當日見丹叔埋位前後都被集郵,真係好受歡迎㗎! 採訪:李維隆

  處境劇《愛.回家》拍足逾7年,無啦啦傳出停拍,高層馬上否認,主要演員之一滕麗名坦言未有聽聞此事,本報亦喺中環巧遇「熊樹根」劉丹拍外景,唔似停拍喎!

  日前下午5時,劉丹單拖現身中環必烈者士街拍攝。早排,劇中播出丹叔同「龍敢威」羅樂林、「譚道德」陳榮峻與及「馬豹」黎彼得以耆英組合「大四喜」登場合唱Rap歌,齊齊玩Hip Hop引起網民熱話,仲帶挈四人搵外快。當日丹叔一出現,就有幾名途人搵佢集郵,丹叔來者不拒,一直keep住好笑容,超nice。之後佢望兩望劇本,即埋位拍攝,劇情講述佢客串喺街頭畫畫,未幾惹來一位外籍男士垂青,出錢購下作品,丹叔大歎驚喜,鬼咁happy。好戲派嘅佢每場戲拍兩take,導演就滿意收貨,丹叔逗留大半小時就爽快收工,然後揸名車走人,似心急回家湊5歲孫女「小糯米」囉!

其他文章
Busking靚聲王 唱而優則演 黃進林感激范振鋒提攜

  由范振鋒親自發掘、又是太太李思欣師弟的新晉歌手黃進林(Michael),畢業於香港演藝學院...

hd