首頁 日報娛樂

唔想女兒有公主病 Bob貼地帶仔女食茶記

14/06/2019
■阿Bob抱住細仔,同三個寶貝女密密斟。
■阿Bob抱住細仔,同三個寶貝女密密斟。 (1/7)

  「有娛圈多仔公」之稱的林盛斌(Bob)同老婆黃碧玲(Pearl)育有三女一子,一家六口加埋兩個家傭、全家開支由Bob負責,捱得好辛苦㗎!周日早上,本報記者喺石硤尾耀東街一間茶記,見到阿Bob湊住三個小公主,滴晒汗咁享受大排檔風味,仲「背妻偷食」餐蛋麵和凍飲。至於10個月大的「金叵羅」細仔林道申則全程由家傭貼身照顧,小王子勁cute。 採訪:方騫平

  阿Bob每逢放假都定必爭取親子時間,日前帶三個女體驗貼地港式生活,踎茶記食早餐!當天晨早加上酷熱警告,大排檔客人唔多,見到阿Bob等人各叫一碗麵及凍飲,上年因血管栓塞要入院接受「通波仔」手術的阿Bob,趁愛妻不在放肆咁食餐蛋麵加凍飲,食到熱辣辣卻津津有味。5歲細女機機見狀,即時將杯凍飲敷喺爸爸面上為父降溫,阿Bob又撥弄囡囡頭髮,兩父女sweet到爆。期間,阿Bob手舞足蹈同三個女吹水,又抱吓細仔玩。食飽飽,廿四孝老竇怕子女熱親,即埋單抱細仔閃人。

  其後,阿Bob接受電話訪問時說:「唔係提前慶祝父親節,咁啱嗰朝早我未有嘢做,啲細路又放假,咪提議佢哋唔好再食漢堡包快餐,車佢哋去食吓茶記,係有啲熱但佢哋都食得好開心,又可以作反飲吓凍嘢,同爸爸出去可以放肆吓。老闆娘好好,開大把風扇對正佢哋吹。」他又指3個女好生性,係最佳父親節禮物:「之前機機扭計唔肯食飯,大家姐同二家姐用成熟腔口同佢講:『你知唔知道爸爸好辛苦咁搵錢養我哋,我哋先有飯食,你唔食飯,爸爸會好唔開心㗎。』之後機機望吓我就自己扒飯,呢啲畫面確係正。」

其他文章
Busking靚聲王 唱而優則演 黃進林感激范振鋒提攜

  由范振鋒親自發掘、又是太太李思欣師弟的新晉歌手黃進林(Michael),畢業於香港演藝學院...

hd