首頁 日報娛樂

補拍《法證IV》 湯洛雯執心穎二灘狂NG 朱晨麗被cut戲成終極受害者

20/06/2019
■當日落完大雨,黃浩然、李施嬅及湯洛雯要喺墳場拍拜山場口,黃浩然話多蚊到黐線。
■當日落完大雨,黃浩然、李施嬅及湯洛雯要喺墳場拍拜山場口,黃浩然話多蚊到黐線。(1/9)

        一個黃心穎搞到TVB叫晒救命,重頭劇《法證先鋒IV》要斥巨資補拍。湯洛雯(靚湯)臨危頂替心穎上陣。重拍第5日,記者直擊靚湯拍劇狂食螺絲,好彩對手黃浩然及李施嬅無詐型,只求盡快完成唔好再節外生枝。最慘朱晨麗(朱朱)因為拍緊另一新劇《大醬園》分身不暇,未能抽期補拍,而佢同黃心穎對手戲最多,所以無奈要Cut戲,據知都Cut得幾多,終極受害者原來係朱朱。

梅小青監製嘅《法證先鋒》系列曾創下43點最高收視佳績,故《法證先鋒IV》落足「彈藥」拍足半年,主角黃浩然、李施嬅、陳煒及朱晨麗等拍到好辛苦,飾演重案組警員的朱朱曾發燒發到38度,嘔到七彩都抱病開工,為部劇出盡力。而原本在劇中飾演記者的心穎同朱朱關係密切,對手戲勁多,正因為要cut晒黃心穎相關嘅群戲同對手戲,連朱朱着住bra top,同心穎一齊打拳戲份都冇得留低。而重拍受製作費及演員放假所限只能拍到50組,大概一個月左右務必完成,朱朱又正趕拍擔正嘅《大醬園》,不論時間及體能都唔容許跟湯洛雯補戲,唯有作出犧牲。

朱朱唔知唔使補拍

  對於朱晨麗被瘋狂Cut戲,監製小青姐承認唔使朱朱補拍,但就話冇cut走她的戲份,究竟拍對手戲點樣可以刪走心穎又同時保留到朱朱戲份?另外,靚湯補拍而朱朱無補拍嘅情況下同時又會Hold到朱朱原有戲份?反而想睇喎。拍劇拍到天昏地暗嘅朱朱完全唔知唔使補拍,「我都係等公司派通告,有工開我一定會開嘅,都係為咗公司啫,最緊要套劇出到街。」 重拍版《法證IV》經已開工,上周二,黃雨過後黃浩然、李施嬅及湯洛雯喺跑馬地墳場拍外景,劇情講靚湯畀黑社會追,她跑去搵拜緊山嘅黃浩然、李施嬅救命。當日雨後又熱又焗,山頭相當多蚊,為連戲着住冬天裝束,演員汗水夾住雨水真係相當難頂。披住長頸巾,身穿外套嘅靚湯跑到索晒氣,同時可見,靚湯發福情況嚴重,虎背熊腰、雙下巴加凸腩,簡單三個字:成身肉,難怪佢話喪跑仲好,當減肥!

靚湯認不足會努力

        拍小青姐嘅戲出咗名唔可以改對白,據當日觀察,靚湯講一句對白至少NG五次,但黃浩然、李施嬅好包容,仍耐心地就住靚湯進度嚟拍,夾手夾腳收拾「爛攤子」。浩然仲大讚靚湯好快上手,仲感恩可以重拍,就算有影響都係正面嘅,天敵反而係蚊。至於靚湯同心穎有乜唔同?他說:「好難去比,兩個都係好鍾意笑嘅女仔,好適合做呢個角色。」至於已離巢嘅李施嬅就坦白話冇諗過要重拍,但離開咗TVB有homesick,重返感覺好親切。對於不斷NG,靚湯坦認不足,「因為要喺短時間記好長嘅對白,我口齒唔夠伶俐,呢方面要加油。」

採訪:方騫平 攝影:張詠森

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd