首頁 日報娛樂

無拖拍同阿媽又行孖咇 楊恭如唔行名店遊藝術館

21/06/2019
■楊恭如與媽媽到中環H Queen
■楊恭如與媽媽到中環H Queen's行藝術館。 (1/7)

  前亞姐冠軍楊恭如,近年長駐內地發展,偶爾才會同阿媽返港shopping。早前兩母女現身中環,但今次唔係去名店掃貨,而係去皇后大道中的H Queen's看藝術展覽。睇完吸收咗一啲藝術營養後,兩人轉場去酒店High Tea,跟住再去荷李活道的大館參觀。楊恭如一到埗已不停用手機周圍影相,乜都睇,愈行愈興奮,最後同阿媽行到天黑才肯離開。採訪:張詠森

  楊恭如08年與補習天王簡俊傑分手後,dry咗幾年,至12年與細她兩年的內地男藝人鄭國霖合演劇集《香木虎》傳緋聞,有指兩人日久生情而譜出姊弟戀。可惜戀情只係傳咗一排,冇耐楊恭如又打回原形,變番出入得媽咪相伴。多年嚟,楊媽媽一直黐實個女,搞到索囡囡冇仔敢埋身。不過楊恭如無所謂,仲好enjoy咁同阿媽周圍去,最近更在社交網大讚媽媽幫她影相的技術愈嚟愈好。

兩母女好行得

  早前兩母女又去中環行街,不過今次唔係去行名店掃貨,而係去文化藝術新熱點H Queen's。兩人行咗1個鐘,之後再去威靈頓街附近酒店High Tea醫肚。急急飲完個下午茶,兩母女又繼續行,目的地係荷李活道的大館。楊恭如一到達即拿出手機不停影相,之後再到不同的展覽館參觀,期間與媽咪有傾有講,表現開心又雀躍。行到大約晚上8時半,楊恭如先同阿媽離開,行足半日都幾好氣力。

其他文章
Busking靚聲王 唱而優則演 黃進林感激范振鋒提攜

  由范振鋒親自發掘、又是太太李思欣師弟的新晉歌手黃進林(Michael),畢業於香港演藝學院...

hd