首頁 日報娛樂

高齡誕B女Miracles齊入ICU 黃澤鋒爆52歲太太 堅持餵人奶

15/07/2019
■黃澤鋒感激老婆冒生命危險,為他誕下女兒「小黃妃」。
■黃澤鋒感激老婆冒生命危險,為他誕下女兒「小黃妃」。(1/7)

  黃澤鋒昨日於社交網報喜,晒出愛女腳仔相公告喜訊,宣佈現年52歲的太太陳麗麗上周一誕下女兒「小黃妃」,囡囡重6磅。其後,新手爸爸接受本報記者獨家訪問時,猶有餘悸講述太太生產時出現「生死一瞬間」。因高齡妻妊娠毒血爆發,產後要入ICU觀察。幸現已一家三口平安回家,太太更親餵人奶,深深體驗到自己50幾歲才生女是一個奇蹟,以及榮升父母的喜悅,因此將B女英文名改為「Miracles」,中文名未定。

黃澤鋒年初興奮宣佈與太太陳麗麗成功造人,一轉眼B女已經出世喇!澤鋒昨於社交網晒出愛女腳仔相報喜,感動背後原來高齡產婦黃太分娩期間出現「狀況」,澤鋒接受本報訪問時猶有餘悸,講述太太生產時的生死一瞬間:「小朋友出世真係唔容易,兩公婆入產房本來滿心歡喜,醫生話手術45分鐘就完成,但突然發生狀況,太太妊娠毒血爆發,血壓飆升要馬上全身麻醉分娩,我唔知當時大人和小朋友發生咩事。託賴最終出世,但醫生話BB唔係好喊,我就同囡囡講『喂,你做咩?』結果佢就喊,一喊就無事。而老婆血壓仲好高要入ICU,等血壓降返先出嚟。唉!女人生小朋友,半隻腳已入鬼門關,當時唔知點處理,好在最後兩個都無事,託賴!心情好似坐過山車咁,天賜份禮物畀你要有考驗,日後會好好做人,好好照顧家庭。」

母女出院回家休養

  澤鋒感謝太太「搵命博」為他生女,上周六母女已出院回家休養,首晚與B女在家相處,形容「感覺好得意」,他甜笑說:「做父母嘅心情好神奇,多咗個小朋友喺屋企好得意。尤其第一晚返家,感覺屋企多咗個人,老婆餵人奶同BB會親近啲。嗰晚夜深時,BB突然擘大眼望我,好似有嘢同我講咁,好神奇。從來無諗過自己50幾歲先生女,係上天賜畀我嘅禮物。」

  澤鋒又指太太現時精神不錯,囡囡很多頭髮很可愛。他笑謂已將整副身家都交給太太,又指囡囡未改中文名,但英文名叫「Miracles」,因為年紀大才生女都是一個奇蹟!他說:「今次在私家醫院生BB用了十幾萬,但三人行很重要,經此一役,深深明白幸福健康和快樂是最重要。」

採訪 : 方騫平 圖:部份由黃澤鋒提供

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd