首頁 日報娛樂

誤傳緋聞 Dry足半年 單身祖兒笑Join老友家庭樂

18/07/2019
快樂祖兒
■祖兒當日心情好好,係咁笑又好好傾。
快樂祖兒 ■祖兒當日心情好好,係咁笑又好好傾。(1/10)

        今年初,39歲容祖兒(Joey)宣佈同劉浩龍結束五年情,半年唔使傳有新歡,對象係英皇娛樂老闆楊受成的33歲兒子楊政龍(Alex)。對於緋聞,Joey話「笑到噴咗幾條泡菜出來」,事實男方已有女友黃子菲(Ava),大家都替容天后心急,首先當事人下月初要開18場演唱會,忙到黐肺,至於想享受親情,陪阿媽又得,約有仔女嘅好朋友,一家大細食個Tea亦得。日前下午就見到Joey約咗音樂人馮翰銘及前歌手老婆黃馨帶埋個仔馮靖去淺水灣食Tea,容天后全程表現歡欣,係咁笑係咁笑。

        回吓帶先,容天后早前被指跟Alex秘撻4個月,覺得有Road原因係Alex在社交網上載好多與祖兒攬頭攬頸的親蜜照,兩人又經常約埋去滑水呀去滑雪呀,又會一齊去睇演唱會呀,有心人以為男女都單身,表面證供成立,仲唔係有嘢?Joey極速為緋聞解話,強調跟Alex「Friend過打Band」,更爆Alex已有女朋友:「正所謂唔好阻住啲後生做正經嘢,都唔好阻住我啦,有女朋友㗎啦,幾唔錯O添㗎,楊仔我識唔識做先!」

約咗老友

話口未完,楊政龍就被爆女友係失婚KOL黃子菲(Ava),兩人更攬實跟朋友同遊新加坡,明顯熱戀中,同Joey緋聞亦立即Close File。至於Joey就忙於為演唱會排練,仲日日拉筋拉到面容扭曲。但拉筋都要唞吓氣,日前就見到Joey現身淺水灣,唔係游水唔係遊車河,係約咗老友,音樂人馮翰銘及前歌手老婆黃馨一家三口,見Joey一落車就急急腳行去餐廳會合,老友留返角落位,Joey坐低無耐已係咁笑。

三大一細食足一個鐘,有食客認到天后但無去打擾佢,期間限定家庭樂後,眾人離開餐廳,Joey同黃馨好好傾,邊行邊笑,前者不時用手搞吓小朋友個頭,而馮翰銘就貼心地幫Joey拎住大紙袋,眾人行經商場,Joey拎返大紙袋行去停車場取車離開。

採訪:李權威、張詠森

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd