首頁 日報娛樂

愛妻體貼「湊」奶奶睇醫生 模範夫婦劉青雲郭藹明 孝心爆棚

23/07/2019
親力親為
■孝順仔青雲和太太Amy一左一右,貼身傍實老人家慢慢行上樓。
親力親為 ■孝順仔青雲和太太Amy一左一右,貼身傍實老人家慢慢行上樓。(1/10)

          55歲嘅影帝劉青雲,同美貌與智慧並重嘅郭藹明(Amy)今年結婚21周年,一早已被公認為娛圈模範夫婦之一。其實青雲兩公婆唔止恩愛,仲超級有孝心,不時被影到陪男方父母出沒中環睇醫生!日前下午,呢pair孝順夫妻又連體出動嘞!當日青雲貫徹其低調作風,戴口罩遮樣,偕51歲凍齡靚妻Amy及外傭細心陪伴劉老太去中建大廈覆診。Amy全程細心傍實,又肉緊扶住奶奶慢慢行,靚老婆愛屋及烏,唔怪得青雲廿年嚟煉成寵妻狂魔啦!採訪 : 張詠森

        美國南加州大學機械工程碩士畢業嘅郭藹明,91年當選三料港姐冠軍,其後拍劇同青雲擦出愛火花,甘為老公放棄做航天工程師。婚後做全職劉太嘅Amy,打理家頭細務又學煮餸煲湯,更負責管財投資錢滾錢,多功能老婆獲丈夫錫到燶。早前,有網友以「安心偷食」借題發揮,發起「最專一男人」選舉,當時開腔維護女友黃心穎、被讚「真男人」嘅馬國明被擁戴做第一位外,曾發表過「太空船」愛妻論嘅青雲,亦被選做第二位「最專一男人」。

左右護法扶劉媽媽

  日前下午2時半,拍落幾部大片嘅青雲放緊假,抽空搵太太陪母親去中環覆診。當日兩公婆帶外傭陪同80幾歲嘅青雲媽媽現身中建大廈。以往恩愛夫婦常被影到帶青雲父母睇醫生,兩公婆總愛一人mark一個,照顧有加。但呢日只得劉老太,二人就化身左右護法,貼身傍實老人家慢慢行上樓。見薄施脂粉嘅Amy皮膚白滑,頭架黑超青春出巡,點睇都唔似五十有一。逗留約兩小時,一行四人落樓,青雲替餅印媽咪拎住X光報告,快步行前搵司機;愛妻就同奶奶十指緊扣,好肉緊咁「湊」住奶奶步出。有個咁好嘅老婆,難怪青雲曾冧爆話「太太係我人生最好嘅禮物」啦!

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd