首頁 日報娛樂

望吳業坤難投入感情 馮盈盈配音要想住男友

09/08/2019
■坤哥和盈盈兩個大細路,落到波波池勁開心,啱晒幫動畫配音啦!
■坤哥和盈盈兩個大細路,落到波波池勁開心,啱晒幫動畫配音啦! (1/4)

  吳業坤(坤哥)和馮盈盈最近首度合作為動畫電影《憤怒鳥大電影2》配音,兩人事前都有做足功課。坤哥笑言今次角色是個英雄人物,同自己有幾分似,而盈盈角色講嘢勁快就啱晒她演。至於戲中兩人會狗咬狗骨,他們笑言這方面好自然不用靠演技,反而有場兩人互冧戲,盈盈要想住男友寶寶先投入到喎!撰文:杜淑霞 攝影:李維隆  

服裝:Coach、The Kooples(坤哥)、MARYLING、RENE CAOVILLA(盈盈)

  由於坤哥和盈盈都是首次參與該電影配音,事前都好乖睇番第一集做功課,而首次做配音工作的盈盈更搵老師惡補,「我出名懶音多,所以之前專登搵咗羅山老師幫我糾正吓啲發音,不過角色『阿銀』講嘢好快,啱晒我平日講嘢節奏。」戲中坤哥演的「阿雄」是鳥島中的英雄人物,他認為這方面同自己最似,「不過『阿雄』唔識同人相處呢方面同我最唔似,同埋佢講嘢好堅定,導演成日話我唔夠信心,喺配音時呢樣都考起我。」

扮鬥氣互窒零難度

  戲中坤哥和盈盈的角色會狗咬狗骨,成日鬥氣互窒,他們笑言這方面完全冇難度,「我哋平日都係咁相處,完全唔使演。」兩人仲即場示範平日點樣互窒,勁搞笑!不過,盈盈話角色後期兩人有小小互冧戲反而考起她,「對住坤哥真係講唔出口,好彩導演提我,叫我諗住寶寶(男友),真係好自然即刻講到啦!」講到正式配音時,坤哥和盈盈都有刻意養聲,坤哥說:「自己都有錄歌經驗,雖然之前唔會特別食啲乜,但正式配音時都有戒口,唔敢食啲熱氣嘢。」平日無停口的盈盈就話,「配音嗰兩日,真係好自然講少咗嘢,因為把聲真係好攰,都想畀自己休息一吓。」講到可以自己揀的話,他們好想交換角色配音,相信到時應該會好好玩喎!

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd