首頁 日報娛樂

玩謝個女 日日Cosplay 李亞男爆祖藍湊女有挫敗感

09/08/2019
■亞男生女後已極速收身,「如果依家唔keep住,到時生多個仲難keep。」
■亞男生女後已極速收身,「如果依家唔keep住,到時生多個仲難keep。」(1/11)

          李亞男去年12月為老公王祖藍誕下得意囡囡天韻(Gabrielle),慶幸 Gabrielle遺傳了她的身高和靚樣。7個月大20幾磅的 Gabrielle個樣仲勁cute,面仔脹卜卜被封為「倉鼠妹」,搞到亞男當正她是玩具日日喪玩Cosplay,更直言:「阿囡都好慘,畀我哋玩謝咗」。不過由於Gabrielle性格比較cool,令身為新一代笑匠的祖藍要扮鬼扮馬先O氹到囡囡開心笑,勁有挫敗感,但亞男更樂見老公為囡瘋狂,更笑指:「我除咗整啲好嘢食留住老公個胃,要生多幾個留住佢個人啦!」講明已準備好為祖藍再添丁。 撰文:杜淑霞 攝影:李權威 髮型:Ted Yeung @ i i Alchemy hair & nail

化妝:K.T. Tsui 服裝:Marina Rinaldi、AQUAZZURA、Atelier Swarovski 場地:ClubONE水中天

        亞男話Gabrielle出世後,令一家人好開心,多了很多笑聲,「我依家成日幫佢換衫,啲朋友又好好送啲衫畀佢,好似扮士多啤梨咁,我日日幫佢影相,佢成為咗我嘅玩具,趁佢依家乜都唔識就盡情玩佢囉!佢日日塊面好多口水,俾我哋狂錫,半夜起身飲夜奶,都要同我哋玩一陣,個女都好慘,畀我哋玩謝咗!佢個樣好cute,好似倉鼠個嘴含住好多瓜子咁,塊面有好多骨膠原,我哋叫佢『倉鼠妹』,係姑姐(祖藍妹妹)幫佢改。」

Cool爆囡囡唔易O氹

  雖然Gabrielle仲細未識反抗,可以俾亞男任玩,但cool cool地的她就唔容易笑,搞到亞男和祖藍要出盡法寶扮嘢,「佢喺我個肚度老公拍緊音樂劇(《你咪理,我愛你!》),佢一聽歌就踢我,佢個天韻都係咁嚟,依家都成日畀佢聽啲好音樂,佢扭緊計有音樂都會安靜啲。佢玩玩具又唔玩得耐,鍾意人同佢講嘢,要有互動嗰啲。(鍾意睇Live騷?)哈哈!係呀!畀佢玩一日好倦,我同佢一齊睇書,教佢讀啲生字,仲要扮埋嗰啲動物,佢先會有啲特別反應。佢又開始模仿我哋表情,好似嘟嘴咁,佢啲神態似我老公,但好彩佢個樣同身高似我,我贏咗,神態就由佢啦!佢性格都似我同老公細個,比較文靜,佢係有啲cool,我哋要出好多力令到佢笑一下,搞到老公個存在感差咗,要睇佢本小姐心情先會笑,我同老公會成日扮貓扮狗叫,好低能嘅嘢出晒嚟去O氹佢開心。」

  亞男坦承有了Gabrielle,令祖藍更黐家,「有啲時間爸爸喺屋企多啲,或者半夜同佢玩多咗,佢又會同爸爸熟啲,反應多啲,所以祖藍唔敢飛得耐,生多兩個佢可能唔飛O添!除咗整啲好嘢食留住佢個胃,要生多幾個可以留住佢個人呀!哈哈!佢以前收工都會即趕飛機返嚟,有咗阿囡之後佢就更加趕返嚟,中途仲要我畀阿囡啲片同相佢止渴。其實我哋拍拖時,仲係曬相年代,佢會攞住我張相睇完擺喺牀邊先瞓,好似幾好笑又好浪漫,不過暫時我同佢電話啲相都係阿囡行先。」

追多個仔就完美

  講到生下一胎計劃,亞男踢爆祖藍想生雙數,「我老公話一係生兩個、四個、六個,一定要雙數,因為佢話唔想中間嗰個被忽略。我就覺得兩個先,唔係生出嚟就搞掂,係要培養佢做人同讀書,同埋香港讀書好緊張,生咁多個我要做好多功課,我又唔想囉!如果畀啲中文嚟,sorry阿囡媽咪都唔識,要等爸爸收工先做到,其實我仲要湊老公呢個大仔,生多個差唔多啦!(仔定女)生多個仔係好完美,但女仔我都好鍾意,因為斯文啲,可以日日都扮靚。」

  至於對Gabrielle期望,亞男認為品格同人格重要過一切,「有好品格就已經係成功嘅人,當然讀書都要盡力,好彩我好睇得開,都唔擔心會變怪獸家長,同埋我細個讀書都勤力,但唔係考第一只係攞B嗰種,所以我唔會逼佢。(如果佢想入娛樂圈呢?)我都會全力支持,但要睇佢動機,如果只係想人哋留意佢,就唔係咁好,要真心對表演有興奮,唔希望佢係三分鐘熱度。」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd