首頁 日報娛樂

被心穎拖累 兩孭飛劇「冰封」 張振朗甩「黑仔王」 靠《包青天》出關

10/08/2019
逆境夠樂觀
■張振朗坦言性格樂觀,就算黑足兩年都識得玩自嘲。
逆境夠樂觀 ■張振朗坦言性格樂觀,就算黑足兩年都識得玩自嘲。(1/11)

  捱咗10年,32歲嘅TVB小生張振朗(Owen)終於受力捧成為「劇霸」,兩年內孭重飛拍落5部新劇,點知兩套受「安心偷食」中嘅黃心穎連累成「倉底貨」;另一部《機場特警》受社會大氣氛影響而無限擱置!張振朗隨即被冠上「地獄黑仔王」稱號。近日,Owen終於靠劇集《包青天再起風雲》出關,不過播映時間又撞正示威,收視未如理想,連他都忍唔住歎句:「唉!我真係黑足兩年,呢個時勢無辦法啦!」問他有無嬲過心穎?Owen冇怪對方不特止,仲幫口求放生,呢位朋友真係唔話得!

採訪:方騫平 場地:桔梗@旺角

  月前被封為「地獄黑仔王」嘅張振朗,主演新劇《堅離地愛堅離地》、《包青天再起風雲》、《牛下女高音》、《機場特警》、《極道怪咖》,先後受「安心事件」及警民關係緊張影響,播出無期,近日《包青天》終攝期推出,但因有網友曾發起「追星運動」狙擊無線旗下藝人,張振朗零商演苦笑說:「有咁多阻滯,我認黑㗎啦!我懷疑自己喺兩年前開始黑到o依家!前排經理人問我有冇犯太歲?原來真係犯咗小小,所以即時去拜神,哈!可能因為咁播到《包青天》。不過,好彩我夠樂觀,呢個咪係演員經歷囉,成為一個男人都要有經歷。咁當然知道劇集播唔到一定會唔開心,其後再得悉《機場特警》又延期反應經已淡淡然,仲識得安慰自己,唔播都唔緊要啦,又唔係未試過。」

受傷影響動作戲

  《包青天》中,張振朗飾演身手不凡的少年「展昭」,點知網民將他同當年「展護衛」何家勁比較,評論他身形太瘦削、身手唔夠好,似由包公保護他、個性又太調皮等。對於負評,Owen受盡委屈剖白說:「首先,劇本講我係紮職前,屬少年版展昭,我只可以做調皮版;其次,兩年前拍完《堅離地愛堅離地》準備入《包青天》劇組,點知喺屯門俾商場天台飛落街嘅大型帳篷擊傷,成個人被打到撻落地傷咗腰同膝頭要坐救護車入院,之後要物理治療,期間做唔到運動,苦練咗兩個月嘅6嚿腹肌化為烏有,拍《包青天》初期仲要撐住柺杖開工,先拍文戲,谷埋最後30日先戴住腰封勉強去打,拍動作戲時流咗好多血、汗水,淚水等,仲試過墮馬4次,雙手痛到『不舉』。如果公司開拍第2輯,我相信會做得好好多。」

  張振朗與黃心穎合作的劇集《牛下女高音》及《堅離地愛堅離地》都被冰封,問他有冇怪過對方?Owen即說:「我從來冇嬲過心穎,我同佢合作過幾次,佢係我朋友嚟。其實件事經已過咗去,希望畀返條生路佢行。」而《堅離地》主題曲是他唱,參加過新秀的Owen希望大家有機會聽到喎!

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd