首頁 日報娛樂

自認變態 黐網紅B仔成狂 Coffee爆唔肯戒餵人奶

21/08/2019
■Coffee話伯伯雖然重磅,每日湊他等如做了健身一樣,不過Coffee強調伯伯身材無超標,「每次檢查醫生話佢嘅身材喺標準之內,不過就係嘅高水平。」
■Coffee話伯伯雖然重磅,每日湊他等如做了健身一樣,不過Coffee強調伯伯身材無超標,「每次檢查醫生話佢嘅身材喺標準之內,不過就係嘅高水平。」(1/9)

        最近其中一個網紅BB,肯定要數Coffee(林芊妤)囝囝「伯伯」(因外形似阿伯而來的暱稱)翟德彥,憑住未夠10個月大已有25磅的米芝蓮肥美身材,加埋充滿佬味的樣貌及「厭世」表情,個人社交平台粉絲已近9萬,隨時多過不少藝人及KOL。既然咁得一眾姨姨和嬸嬸歡心,Coffee當然要帶伯伯同《頭條》讀者打招呼,仲玩埋即場度三圍滿足一眾粉絲「睇肉肉」需要。身為人氣BB媽咪的Coffee,當然亦係伯伯頭號粉絲,佢仲自爆餵囝囝人奶到O依家,全因自己變態唔捨得放手,怕唔餵人奶囝囝就唔再黐自己,極之享受做媽咪感覺,所以已有計劃再生B。

採訪:杜淑霞 攝影:李權威 場地:The Stadium

        Coffee謂自從伯伯出世後,每日既要湊B又要兼顧工作,雖然好忙,但卻是人生中最幸福的日子,「我以前成日以為自己好事業型,以為生咗BB自己會好唔習慣湊B嘅生活,連我老公都估唔到,原來我母性咁強,我O依家反而對住個仔已經好滿足,連返工做嘢都唔係太想,所以都推咗唔少工作,呢九個月係我人生最幸福嘅日子,真係冇嘢可以取代到。」

  就算相對最辛苦的餵人奶,Coffee一樣好享受,「最辛苦可能係餵夜奶,因為BB全晚醒幾次要飲奶,所以我會趁朝早佢瞓醒,我將佢交畀姐姐(家傭)湊住,我補眠番一、兩個鐘,所以佢出咗世後,我係長期唔夠瞓㗎!」不過,Coffee完全冇諗住要幫伯伯戒夜奶,「其實佢O依家主力食固體食物,飲奶都係心癮嚟,但係我唔想幫佢戒住,可能你哋會覺得我好變態,不過可能好多媽咪都好似我咁,好享受佢需要我嘅感覺,反而好驚有一日佢唔再黐我,所以可以嘅話我會繼續餵人奶。」

入學前退出幕前

  講到伯伯成為網紅,Coffee坦承相當意外,「我最初係因為佢3個月大時太樣衰,同埋我又可以方便自己搵佢啲相同埋片,於是咪幫伯伯開個ig囉!真係冇諗過佢個勁老積樣,同埋好厭世嘅表情,加埋我啲說明,會咁多人鍾意,佢啲粉絲差唔多有成9萬,就嚟多過我啦!哈哈!我啲朋友成日講,我喺呢個平台寫嘅嘢,先係真實嘅我,所以我都寫得幾開心㗎!」不過Coffee講明等囝囝大啲就會引退,「我同老公都商量過,想佢返學之後,做個平凡嘅小朋友,所以佢入學前應該會退出幕前,同埋佢到時高咗又瘦咗,應該啲粉絲會離棄佢㗎啦!」

  不過Coffee已計劃好搵接班人,「我同老公有共識,至少會生多個,如果都係仔就再生多個,老公話唔想得兩個仔會有比較同競爭,如果生第二個係女就即刻收工。」問到對伯伯期望,Coffee話同老公都唔係怪獸家長,「好多人問我搵咗學校未,我哋完全冇搞過,我哋會畀佢好大自由度,當然都要正常讀書,我哋仲諗住要佢18歲就獨立,我同老公都係18歲開始自己搵錢,到時我就同老公周圍去玩。」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd