首頁 日報娛樂

儲落8萬粉絲 肉丸身形 睇見都冧 李璨琛帶網紅B女出巡派心心

22/08/2019
(1/8)

        43歲嘅李璨琛(Sam),其愛妻梁志瑩去年3月尾誕下小公主元元(Lucy),潮人夫婦養肥B女,囡囡一如其名圓碌碌,有蠟筆小新面珠登加肉丸身形,cute到爆炸。李太仲幫得意B女開咗個社交page,現時有逾8萬粉絲,連星媽謝安琪、鄭希怡等都係佢Fans,人氣勁過Daddy呀!日前下午,Sam兩公婆帶17個月大嘅萬人迷B女出街同友人high tea。齊蔭元元一出現,秒殺唔少途人搵佢集郵,可愛B女發放正能量,大受歡迎! 採訪 : 梁志明

        去年酒駕被判停牌嘅李璨琛,屋企多咗個萌爆baby都修心養性嘞!變咗深閨湊仔公。早前,Sam開拍港台劇《星星的孩子》時,提起B女即冧笑話元元已識得做家務,幫手掃地清潔,又大讚囡囡有好多BB用品贊助,幫佢慳番唔少錢!至於會否追多一個?Sam就話「順其自然啦!」

途人猛撩「肉丸妹」

日前周日下午3時許,唔少港人冒雨去遊行,做父母嘅阿Sam和太太亦出一分綿力啦!就係帶可愛寶貝女出巡,o氹吓人開心囉!當日兩公婆帶「肉丸妹」去太古城同朋友high tea,同行有圈外好友一家三口、女友人,仲有阿Sam好友、關秀媚男友李煒尚(前名李尚文)。一行8人食cake歎茶,但過幾日就17個月大嘅元元坐唔定,不時落地行。見身穿裙仔嘅肉丸妹走嚟走去笑瞇瞇,成個開心果咁帶歡樂畀別人,引嚟唔少食客上前撩佢玩。阿Sam亦傍實囡囡同途人say hi又飛吻等,難得肉丸妹自細被媽咪訓練做「寫真小天后」,唔怕鏡頭又唔怕生保,大眼B女絕對有潛質入行做萌爆星二代!

逗留40分鐘後,眾人起身離開,李太抱愛女坐上BB車,小朋友最唔like有束縛,無得四圍走嘅元元喊到拆天,要auntie上前呵o氹才收聲。之後兩母女和友人行陣超市;阿Sam就獨自去取車接妻女,廿分鐘在門口會合,阿Sam揸車載妻女走人。

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd