首頁 日報娛樂

感激鄭則仕助搣走廢青感 吳業坤興奮演技有突破

07/09/2019
■吳業坤拍劇開竅後希望可以挑戰更多唔同角色。
■吳業坤拍劇開竅後希望可以挑戰更多唔同角色。 (1/7)

  邁向「三張嘢」的吳業坤終於大個仔,喺TVB新劇《街坊財爺》中有好多突破,除初次演繹劇集主題曲外,仲由以往學生哥「升呢」做專業人仕,飾演鄭則仕的契仔,是一位蠱惑律師,有幾場戲被尋仇打到飛起。為更有說服力,坤哥不惜首次為拍劇喪減10磅。另外,又會獻出熒幕初吻畀姜麗文:「好彩有Kent哥同監製幫手搣走以前廢青嘅感覺,成個角色立體晒。」

採訪:方騫平 場地:女人街食飯公司

  繼《荷里活有個大老千》後,吳業坤再跟Kent哥結片緣,因為上次捱鬧,所以今次醒醒定定,唔會重複犯錯,更加唔敢Hea做:「同Kent哥合作壓力非常大,Kent哥喺片場好嚴肅,上次拍《大老千》時佢話我講嘢太快,教咗我又做唔返,所以咪畀佢鬧。今次叻咗搵到竅門,我先學咗佢嗰套,再加啲自己嘢入去,Kent哥冇再鬧我喇,連監製梁材遠都讚我演技突飛猛進,其實Kent哥係鞭策嗰種鬧,佢過咗好多功力畀我,我喺佢身上獲益良多,好開心再合作,講真,佢肯教我經已執到啦。」

首唱劇集主題曲好開心

  坤哥自爆今次演出落足100分力,「我好用心去做專業律師呢個角色,第一次為咗拍劇做運動,加埋節食減肥,喺台灣拍《Ben Sir睇樓團》時忍口一啖飯都冇落肚,決心唔要再好似《誇世代》咁腫到變浮屍。減咗10磅後冇咗個包包面,當我講自己個名攞戲服時,連服裝姐姐都唔認得係我呀。除此之外,作為律師,講嘢、肢體動作都要留意,唔可以好似隻雞咁行到彈彈吓咁輕佻,要昂首挺胸向前行,呢啲落足心機嘅細節位,好希望觀眾都留意到。」至於唱到劇集主題曲係咪升咗「呢」?坤哥即否認:「由《超級巨聲2》入行,一直好期望有機會唱到劇集主題曲,終於畀我等到,兼且唱到自己套劇主題曲,就更加有feel。但我唔認同係升呢,只可以講係個人技能上提升咗少少,期待慢慢被人認同。」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd