首頁 日報娛樂

瞓身做歌手 100萬元製靚聲碟 阮兆祥決暫緩續約TVB

11/09/2019
■祥仔唱足30年歌,依然對音樂不離不棄,「就算嗰時轉過去銀行做,都冇諗過唔再唱歌。」
■祥仔唱足30年歌,依然對音樂不離不棄,「就算嗰時轉過去銀行做,都冇諗過唔再唱歌。」(1/8)

        阮兆祥近年搞笑扮嘢、拍劇做主持為主,可能大家都差啲忘記他是歌手出身,除17歲參加過新秀,30年前更出過個人大碟。其實這個歌手夢,祥仔一直冇放低,最近更獲唱片公司支持於下月25至27日舉行《King Of Dreams》演唱會,兼推出靚聲碟《大夢想家》。祥仔坦承,呢個時勢難得有公司肯揼本過100萬製作唱片,仲可以自己揸旗參與製作,為瞓身做歌手,決定暫時唔續約TVB,仲強調:「我同TVB關係唔係咁脆弱嘅。」祥仔話新碟主題曲《大夢想家》正好是自己寫照,更自爆入行後因收入太少,連拍拖都冇錢,曾短暫去過銀行打工,但太悶好快就辭職,證明他一世仔都要靠創作搵食。

祥仔上次推出個人專輯,已是1989年的《我心深處》,相隔30年再決定出碟,當然唔可以求其,「今次我哋花咗好多時間去揀歌,由於係靚聲碟,除咗新歌《大夢想家》外,仲會翻唱唔同年代嘅女歌手嘅歌,搵一啲我有感覺又適合我唱嘅歌。(點解淨係揀女歌手?)我唱女仔歌唔會有比較,唱得好過人哋就唔係幾好啦!哈哈!」

修哥讀白搞喊人

  雖然是翻唱歌,但祥仔一樣花盡心思,「我哋重新編曲都花咗好多時間,最特別應該係《天各一方》,原裝係曾路得唱,俞琤讀白,今次嘅版本好似續集咁,啲讀白有啲唔同,所以搵嚟心目中最佳男主角修哥(胡楓)幫手,我打畀佢時,佢仲專登整蠱我,『漏』住口咁話係咪真係搵佢講。不過,到錄音時佢用把好有戲嘅聲去講,搞到在場嘅工作人員個個都眼濕濕,相信到時聽眾應該會鍾意。」不但歌曲,連唱片封套祥仔都親自搵人幫手,「我一直好鍾意Super Girls嘅Aka(趙慧珊)嘅畫風,所以搵咗佢幫我畫,要請佢食飯多謝佢先得。」祥仔透露唱片現正在日本做後期及混音,難怪要花過百萬製作。

  既然瓣瓣祥仔都有份參與咁瞓身,仲要養足精神去錄音,所以早前決定暫時唔跟TVB續約,「其實樂小姐(樂易玲)同我傾咗好耐,但係我咁耐冇出碟,又難得有公司肯咁揼本畀我去製作,我好想專心去做好件事,如果續咗約拍緊劇,到時好難專心去做,所以都係暫時唔續集,況且我同TVB關係唔係咁脆弱嘅,遲啲可以再合作過。」

曾轉打銀行工

  講到新歌《大夢想家》,祥仔話完全是自己寫照,MV仲搵來不同領域追求夢想的人講他們的故事,希望鼓勵大家不要放棄追夢。不過,原來祥仔都曾經放棄過,轉行去做銀行打工,「嗰時我入行冇耐,喺港台電視部度做,只得500蚊底薪,要有其他工作先會有多啲收入,但係我長期得底薪,嗰時仲要同人拍拖,唔好話照顧個女仔,連拍拖都冇錢,決定搵份穩定收入嘅工,我記得去銀行見工時,經理認得我仲問我係咪玩,雖然佢後尾請咗我,但係我每日喺金庫數銀紙,真係太刻板,結果我捱咗個幾月終於頂唔順,不過令我明白到,自己呢一世都係要做創作有關工作先得。」不過,祥仔話有今日全拜阮媽媽所賜,「細個媽咪覺得我好似書蟲,星期日都掛住返學,於是畀我聽歌,仲叫我喺親戚面前表演,所以我讀書時已成日參加歌唱比賽。」

  講到演唱會,祥仔話會將這30年影響他的音樂同大家分享,亦會邀請30人樂隊伴奏,「到時我仲會苦練一樣樂器表演畀觀眾睇,希望會畀到大家驚喜啦!」由於搵到著名設計師陳華國幫手造衫,祥仔笑言要減番小小着得好睇啲。至於嘉賓除了羅凱鈴外,祥仔則大賣關子。

撰文:杜淑霞

攝影:李維隆

髮型:Eddy Kwong

化妝:Tiffi Wong

場地:Playground

(Entertainment) Ltd.

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd