首頁 日報娛樂

提離世愛貓心感自責 袁文傑落淚心痛寶貝捱苦

13/09/2019
■袁文傑對囝囝離世好內疚,不斷反問自己係咪判斷出錯?
■袁文傑對囝囝離世好內疚,不斷反問自己係咪判斷出錯? (1/8)

  袁文傑演出的劇集《街坊財爺》及《她她她的少女時代》分別推出,頻頻有得曝光本應值得開心,但因10歲愛貓囝囝病逝而心存自責,不時偷泣。一提起囝囝,他即泛淚:「年幾以嚟花咗20幾萬醫藥費,我亦明白Cancer係冇得搞,但當中醫療過程,我覺得好唔舒服,唔係肯畀多啲錢花費喺收費貴嘅醫院,救到嘅機會就會大啲,經歷令我好內疚,更加遺憾冇把握黃金時間同囝囝一齊影結婚相。」採訪:方騫平



  12年,袁文傑的異國短毛貓囡囡因為腹膜炎病逝,當時他傷心崩潰,需要長時間去「療傷」,直至年多前囝囝開始患上淋巴癌,袁文傑再鼓起勇氣和愛貓一起作戰,但經歷令他不好受,亦想公開一吓。他憶述說:「我花咗好多錢、時間同心思,只求囝囝可以舒服咁走完全程,佢5月1日生日,生日後即復發,冇胃口變瘦,醫生同佢進行第2次化療,不過一針後唔見有改善,醫生診斷冇胃口原因,係因為膽管塞咗,蛀咗牙,唯有聽醫生話麻醉剝牙,抽膽液,但通完兩日再閉塞,醫生仲提議話開刀用支架撐開膽管,卻遭我反對。」

使20萬醫藥費

  之後醫生再喺囝囝膽管搵到有真菌,因為前所未有個案,叫袁文傑去搵處方相關嘅藥物,醫院唔會有提供。之後袁文傑喺北角一間動物診所搵到有關藥物,用$500買到10日藥,與此同時,主診醫生同樣搵到藥,但收費接近$7000蚊,昂貴原因是貨源唔同!「我見太貴一度提出唔要,但唔可以,原因係專為我訂。」貴不是問題,最重要有效,但囝囝食完藥後未見好轉,袁文傑又要開工,只好由女友張潔蓮帶囝囝去插餵食喉,「點知主診醫生竟然話會放假三周,大假前夕full booking,又唔想交由同事接手,提議我返去家庭醫生度處理。年多以嚟我喺呢間醫院花咗20幾萬醫藥費,明知佢嚴重,狀況又逼在眉睫,要求救佢命竟然唔接。」

  最後階段囝囝中風留院ICU,當晚主診醫生唔睇佢,腦科又話要收工,除咗定期餵食,留院期間乜都做唔到。翌日(8月7日)醫生話囝囝狀況太差四肢無力,再全身麻醉做磁力共振,話半個腦出晒血,醫院仲話可以喺抽嘢化驗睇吓係爆血管定Cancer上腦,只要唔係上腦就有康復機會,結果又要囝囝留多晚院,使多3萬幾。8月8日早上9時多,報告出咗唔係Cancer上腦:「堅持帶囝囝走,因為佢經已冇晒意識,我好內疚,應該早一晚接走佢,抱住佢陪佢喺身邊,而唔係要佢喺最後兩日獨自留喺間冰冷,冇人理嘅籠入面。」經歷更教他想做的事,要好好把握,不要再錯失了。

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd