首頁 日報娛樂

廿年「無飯夫婦」 出得廳堂 唔入得廚房 50歲伍詠薇揀飯煲學做煮婦

13/09/2019
的骰size
伍姑娘捧住個二人用嘅迷你飯煲check。
的骰size 伍姑娘捧住個二人用嘅迷你飯煲check。(1/8)

        今年半百嘅美魔女伍詠薇,月前撇甩老公練海棠獨遊海南島,人妻大晒fit爆水着照,自豪話「25年前嘅一件頭泳衣都啱着」,被封「伍索」!凍齡功夫超班嘅伍姑娘出得廳堂,但結咗婚廿年都被取笑係「無飯主婦」,距離完美人妻始終差一步。日前下午,本報發現素顏伍姑娘拖實老公喺銅鑼灣睇家庭電器,見兩夫婦主攻揀迷你飯煲,睇完一個又一個,似乎想搣甩「外賣夫婦」稱號,轉食健康住家飯喎!

靚太伍詠薇,99年同拍拖8個月嘅練海棠閃婚,婚後enjoy二人世界,今年7月1日係兩公婆結婚20周年大日子,二人去咗日本sweet吓慶祝。多年嚟,練太都唔怕人笑佢係「無飯主婦」,試過有人問佢會否的起心肝學廚?伍姑娘決絕話:「唔會!我唔鍾意,又有潔癖,中菜咁多芡汁,又要落手撈乜撈物,會整污糟對手!(老公有無投訴?)佢敢?佢唔驚我揼佢呀!」所以人妻形容同老公練海棠係「外賣夫婦」。

細細個 二人用

不過世事無絕對!日前下午5時,素顏伍姑娘戴上口罩密冚星味、同老公穿上白色情侶裝,現身銅鑼灣怡和街一間家居專門店。見兩公婆早有目標,一齊行去揀飯煲。老夫老妻好有默契,望兩望就睇中一個大約二人用嘅迷你飯煲,人妻拎上手仔細check吓,然後又揀吓顏色及其他size。之後,兩人再睇另一款,同樣係小巧的骰嘅迷你飯煲,啱晒兩夫婦用啦!之後兩人再向女店員查詢,似乎想搵個有內置蒸架嘅飯煲仔,睇多兩款都唔啱心水,就無癮拖手走人。

7‧1瓷婚紀念日

  伍詠薇同丈夫練海棠結婚20年,男方曾兩度「偷食」,但兩夫婦最終和好如初。月前,人妻感性發文:「今天是我倆結婚20周年…老練,我沒甚麼再給你,最好的時光已經給了你,接下來的日子,下半場人生,一起好好生活吧…。」

採訪 : 梁志明

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd