首頁 日報娛樂

兩屆影帝點名讚小生花旦 鄭則仕想跟王浩信學嘢

20/09/2019
■Kent哥自嘲係小演員,冇江湖地位,未必有機會同心儀演員合作。
■Kent哥自嘲係小演員,冇江湖地位,未必有機會同心儀演員合作。(1/6)

  繼《荷里活有個大老千》後,68歲兩屆影帝鄭則仕(Kent哥)再出新作,喺TVB新劇《街坊財爺》中飾演經營財務放數的貴利王「戴金仔」,跟一班好戲之人邵美琪、苑瓊丹等鬥戲,大放笑彈外,又有感動位過足癮。未來,Kent哥點名最想跟王浩信、佘詩曼合作,大讚視帝王浩信係TVB趨向成熟演員進發的演員,至於阿佘多年嚟都Keep住有鬥心,演技有變化。  

  鄭則仕一年幫TVB拍一個劇,但唔理拍完幾時播,堅持好戲就會有人睇:「《街坊財爺》中苑仔(苑瓊丹)度嘅對白好好笑,平日我都會調整吓對白,但完全唔敢掂佢嘅嘢,每次同佢做對手戲都好似大考小考咁,好怕會接唔住。至於邵美琪自從《老友狗狗》合作過後,我一直等咗佢10多年,最欣賞佢除咗工作態度認真,喺佢身上有種獨特味道,就算咁資深,仍然會好努力改變自己帶到一份新鮮感畀人。好似嗰場講我哋慶祝結婚周年,錄影時佢突然好自然咁錫我一啖,嘩,當時全場嘩然,真係又驚又喜,佢投入到將自己變咗劇中身份,其實好難做得到,佢嘅『真實』令我驚惶失措到面紅,搵番後生嗰種心態,撞到好演員就係有呢啲化學作用。但其實戲外,我唔太敢望呢啲靚女,唔係因為怕老婆林燕明,我老婆唔惡好好㗎,做嘢以工作行先。」

讚邵美琪代入角色

  讚完新劇對手,Kent哥亦點名想跟視帝王浩信及視后佘詩曼合作鬥吓戲:「我留意到王浩信好用心去改對白,好似《踩過界》咁,見佢啲對白好有哲理,有意識形態,別樹一格,我好想跟佢學吓嘢,只要有角度就算佢改我對白都唔介意,佢有能力就要參考人哋啲嘢,自己只係小演員冇阿哥格,唔好計較資歷同身份,咁先有貼地啲嘢,可能我見盡人生高高低低,唔似得後生仔咁自我,要受人哋尊重,應該先去尊重人。另外,阿佘不停改變中求進步,亦想合作。」

採訪:方騫平 場地:ClubONE水中天

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd