首頁 日報娛樂

內地唔Buy 孖陳豪鬧市 被港粉「集郵」呵番 視后李佳芯 晒長腿演技大爆發

09/10/2019
視帝視后鬥戲
■三度合作嘅陳豪和Ali默契十足,當日兩人埋位前後都有講有笑。一roll機,人夫秒速變chok,好專業。
視帝視后鬥戲 ■三度合作嘅陳豪和Ali默契十足,當日兩人埋位前後都有講有笑。一roll機,人夫秒速變chok,好專業。(1/9)

        去年憑電視劇《BB來了》首封無線視后嘅李佳芯(Ali),之前於社交網呼籲港人登記做選民,而遭內地網民封殺,更傳出被大台「雪藏」。不過,日前本報記者直擊Ali和視帝陳豪,現身銅鑼灣拍新劇《愛美麗狂想曲》時不知幾受歡迎!當日見Ali短裙晒長直靚腿,拍攝一場大想頭嘅傻大姐搞笑戲,幾個鏡頭都一、兩take OK。其間,途人紛紛圍住人夫和女神合照,視帝視后出巡,非常熱鬧。



女神Ali連月嚟飽受攻擊兼要通宵趕拍新劇《愛美麗狂想曲》,坦言「身心疲累」,好在唔使開工時,仲有男友陳炳銓甜蜜慰藉。近日,更有指Ali被飛出《BB來了2》,由岑麗香頂上,連帶男主角黎諾懿亦被馬國明頂替;而《踩過界II》亦無得留低,改由張曦雯做女主角。對於《BB 2》易角一事,Ali稱之前收到消息該劇押後至明年拍攝,換上馬明和香香,自己唔會失望,又謂公司換角色非首次。

認真對稿

日前下午,Ali和三度合作嘅陳豪踩落銅鑼灣拍《愛美麗》外景。視帝視后捱熱在街上對稿後,才正式拍攝。當日戲份講述短裙Ali和陳豪瘋狂掃寢具後,再在街頭得意忘形,見女方愈講愈興奮,雙手fing高枕頭說:「嗰日喺會場唔該晒你呀!如果你再撮合我哋拍拖,到時佢派架私人飛機嚟接我去阿拉斯加食長腳蟹就好嘞!」只見陳豪一手扯住Ali,再沒好氣說:「CEO呀!CEO呀!We over there。」搞到Ali勁無癮。

由於現場太多雜音,導演要求拍多次,二人都笑笑口再埋位,非常專業。及至到陳豪出手扯回Ali行返前面時,Ali高踭鞋被渠蓋kick實,陳豪見狀馬上叫人幫幫佢同時又無放手,怕Ali跌倒,然後風趣說:「佢(Ali)起磚呀!」二人隨即對望爆笑。其後拍埋唔同角度鏡頭,兩人準備離開時,火速被途人包圍求合照,Ali和陳豪友善留步,逐一跟fans傾偈和影相,大打親民牌。最後,見Ali上公司車換番自己衫,才上助手車齊齊走人。

採訪 : 梁志明

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd