首頁 日報娛樂

娛圈有愛 姐級藝人報紙包錢助渡難關 林子博感謝 Sammi古仔救老婆

11/10/2019
人間有情
■林子博透露工作已排至農曆年令太太好安心。
人間有情 ■林子博透露工作已排至農曆年令太太好安心。(1/9)

        林子博為了照顧罹患極罕癌症「平滑肌肉瘤(腹腔)」第4期的老婆董燕君(Shirley)及一對年幼子女,心力交瘁,同時間合作十年,約滿TVB後無得留低。幸好娛圈有愛,本周三晚(9日),TVB《娛樂新聞台》監製張志明率一班主播跟林子博食火鍋Farewell,他有感而發說:「我冇怪過TVB,主持娛樂新聞咁多年為我帶嚟人脈,喺呢件事上好幫到手,唯有講句江湖再見!」因為醫藥費昂貴,他坦言,鄭秀文、張衛健及古天樂等,甚至在TVB極具地位嘅姐級藝員都有出錢出力助他渡難關,所以生活費及太太醫藥費暫時OK,大家可放心。

繼「A記同學會」鮑起靜、江美儀、袁文傑、蔡國威、陳煒及陳啟泰等設飯局為兩公婆打氣外,TVB高層張志明都有情有義,林子博點名讚揚說:「當年東亞衛視執笠我冇嘢做,佢一手一腳帶我入TVB。我唔係生意人,但明白作為一個企業,冇收入何來有開支?我會抽離啲睇返成個大環境,只不過我咁唔好彩,呢段時間屋企有事啫,希望唔好再黑落去!」

陪伴老婆勇敢抗癌

  雖然老婆患病又不獲續約,但林子博好樂觀。「當初沙士死咁多人,我執番身彩仲有命留喺呢個世上玩,無論順境逆境應該冇乜問題,最緊要健康。以前做《今日睇真啲》見得太多生離死別,世界上有太多諗唔到嘅嘢。我都有同太太講呢啲道理,正如我控制唔到份工一樣,咁就唔好諗,佢食藥、做化療呢啲嘢都唔係佢控制範圍內,佢冇得揀,我可以做到係幫手控制佢,分散太太注意力,令佢開心啲。」子博最感恩出事後,各界紛紛相助:「高皓正搵我幫一間慈善機構做Part Time,簽半年,每個月2萬,加埋接咗3個收現金嘅司儀Job,收入同以往喺TVB兩萬幾月薪差唔多,慳慳哋勉強夠家庭開支,仲冇咁困身,因為年尾前都要陪老婆做化療,每3周做一次,我好想陪佢行埋呢段辛苦嘅

路先。」

藝人齊助太太醫療

  問到太太醫藥費方面,子博感激娛圈人幫助,如鄭秀文、張衛健及古天樂等,「具體幫咗幾多,點幫就唔好公開喇,古天樂話10月中返港會再搵我,初入行就係拍電影,我梗係想拍戲啦;家燕姐大女石祐珊話介紹我幫一間公司做市場管理;張衛健錄咗條聲同我哋打氣:『Shirley加油呀,大帥哥撐你,都會為你哋祈禱,好快會冇事,最緊要保持良好心態,開心又一日,唔開心又一日,日日都笑騎騎面對一切。』最意外係一位有份量嘅姐級藝人,佢送我兩袋嘢,一袋係月餅,一袋係用報紙包住一卷比拳頭細啲物體,打開有一疊千元鈔票,有幾多錢就唔透露喇,我知佢唔想公開,但我真心好感激佢,呢啲錢全部會用返喺太太嘅醫療支出。」

自己努力跑生活費

  老婆醫藥費有善心藝人幫忙,至於生活費就由子博『跑數』,兩者不能混淆。「之前太太完成咗第一個階段化療,但腫瘤有抗藥性,暫時冇乜料到,唯有不斷轉藥,口依家等緊第3隻化療藥報告,預計兩周後會有結果。太太好擔心12月後完成所有化療後點算好?我唯有安慰佢:『可以繼續做西醫以外嘅事,如做艾灸、食幹細胞健康產品、做量子療法等。』用捐款樣樣試吓啦,最希望報告結果話新藥有料到,咁即使12月完咗化療,都可以Keep住用其他方法抗癌,病人心理狀態都好重要。」原先行樂獅子會辦動畫電影《長毛雪寶》慈善放映場幫太太籌醫療費,但我要求幫埋同路人(3個病友),既然有咁多人幫我,我都要幫返其他人,日後會做更多慈善,用愛去感染其他人。」

採訪:方騫平 攝影:李權威

場地:Cubus 28@開平道

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd