首頁 日報娛樂

陪大女跳《Baby Shark》回春 城城着「減齡Tee」拖愛妻淺水灣漫步

18/10/2019
勁有夫妻相
凍齡人夫城城打扮後生,同年紀相差22年嘅愛妻Moka睇落好登對,且笑容一致好襯。
勁有夫妻相 凍齡人夫城城打扮後生,同年紀相差22年嘅愛妻Moka睇落好登對,且笑容一致好襯。(1/10)

        本月底踏入54歲嘅不老城城郭富城,趁下月開拍新片前,近日不時撇下兩個寶貝囡陪愛妻方媛(Moka)。繼日前恩愛夫婦被影到拍拖行維園放閃,日前周日晚上,城城揸辣跑載青春人妻去淺水灣高調浪漫遊。當晚,保鮮人夫着上近日至愛嘅粉藍色「減齡Tee」、孭背囊現身,而太太亦有悉心打扮,着上仙氣白長裙,兩公婆拖手慢慢行,似搵餐廳撐枱腳。只見沿途有唔少遊人認出城城,但佢一於少理,keep住微笑繞住太太,似足蜜運情侶咁煙韌呀! 採訪 : 張詠森、李權威

        

育有兩女「大寶」Chantelle(郭詠希)與「二寶」Charlotta嘅城城,每次提起寶貝女時總是甜絲絲。早前,舞王城城獲邀教小朋友跳洗腦兒歌《Baby Shark》,人父冧爆話:「大女扭計時就嚷着要聽『doo doo doo 』,又唱又跳。」仲大爆兩父女一齊跳「鯊魚舞」,並有拍片留念。至於半歲B女「二寶」,城城就話係個「肥BB,大髀仔似米芝蓮」。

揸「尿片車」出巡

  雖然父愛氾濫嘅城城開口埋口講囡囡,但其實人夫鍾意用時間同行動去冧妻。日前晚上7時,城城揸住佢架買入價約520萬嘅「尿片車」,載淡妝靚老婆Moka現身淺水灣。郭氏伉儷一落車即恩愛合體,手拖手sweet吹水。見保鮮人夫着上近日至愛嘅粉藍色「減齡Tee」、孭背囊;城嫂亦有悉心打扮,長頭髮配上仙氣白長裙,加多個名牌包包黐實老公。見兩人拖完又繞手慢慢行,沿途睇吓餐廳餐牌,似搵地方撐枱腳。

  兜咗一個圈,似乎唔啱胃口,模範夫妻就欲行去超市shopping,惜超市剛剛關門,有啲掃興,但城城同愛妻咬吓耳仔,火速o氹到Moka瞇眼甜笑,再雙雙放閃離開取車。當人夫為愛妻打開車門時,記者上前採訪,城城心情好靚有問必答,問佢原本是否來開餐?城城說:「熱呀!今日!(暗示露天餐飲唔啱食)。」然後表示「嚟行一行」,最後主動同記者say bye就開車走人。

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd