首頁 日報娛樂

淡水情人橋博艷遇 黃建東望下次有女陪旅遊

24/10/2019
■阿東在淡水情人橋擺晒心心甫士,希望有艷遇埋身。
■阿東在淡水情人橋擺晒心心甫士,希望有艷遇埋身。 (1/8)

  黃建東早前趁住未開劇,同舞台劇演員朋友去了轉台北玩,但原來這是他人生第二次去台灣,由於他有接近20年冇去過,所以去玩和食的地方,都是港人去到唔去的地標。不過,阿東自爆此行仲有秘密目的,就是去淡水情人橋博有艷遇成功脫單,「希望下次有女朋友陪,唔使再兩個麻甩佬去玩啦!」 採訪:杜淑霞

  阿東上次去台灣旅行,已是中學時與家人跟旅行團去玩,「我自己都覺得實在太離地,我又鍾意食台灣嘢,趁演完舞台劇,又未開王心慰監製嘅新劇《失憶24小時》,淨係拍《絕世港佬》,咪抽5日去轉台北,同大家拉近番距離。」

  由於台灣所有嘢對阿東來講都好新鮮,難得朋友又肯陪他再去,所以他唔介意畀人笑冇新意,「有啲地方就算我之前去過,但過咗咁多年都唔同晒,好彩朋友由得我揸主義,雖然有啲嫌棄,但都肯陪我再去過,真係好兄弟!我覺得最靚係淡水同野柳啲風景,當然台灣啲嘢食一定正啦!好似喺饒河夜巿食嘅藥膳排骨咁,啲湯又濃,排骨又入味,我本嚟諗住減肥,點知變咗增肥之旅,不過去得旅行放鬆,就唔諗咁多,好彩返嚟狂做運動,好快減番幾磅。」

  見阿東在淡水情人橋擺晒心心甫士,他解釋此行原來另有目的,「本嚟諗住喺情人橋睇吓會唔會有艷遇,希望下次有女朋友陪,唔使再兩個麻甩佬去玩啦!點知完全冇人理我,唯有繼續專心做嘢,快啲上車買樓做業主先啦!」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd