首頁 日報娛樂

拍《失蹤》狂嗌喪跑歇斯底里 阿嬌自爆發晒脾氣落老公身上

09/11/2019
■小龍對於集齊跟Twins合作相當興奮開心,一句:「Yeah!」搞到阿嬌都忍唔住笑!
■小龍對於集齊跟Twins合作相當興奮開心,一句:「Yeah!」搞到阿嬌都忍唔住笑!(1/10)

        阿嬌鍾欣潼去年正式嫁畀台灣醫生、「醫界王陽明」賴弘國後,工作冇放慢腳步,婚後首部電影、跟凌文龍(小龍)首次合作的《失蹤》亦快將推出。電影主題講「結界」,戲中阿嬌為搵失蹤多年的父親,經常要狂嗌、喪跑、歇斯底里,她同期仲要拍攝另一部電影,再加上要跟當時仍未註冊的賴醫生飛去英國拍攝內地真人騷《爸媽學前班》,阿嬌自爆一度壓力爆標抽離唔到,將脾氣發晒喺老公身上。不過學小龍話齋,兩人最終順利結婚,證明阿嬌當時冇嚇怕賴醫生,賴醫生仲似乎好適應有個演員老婆O添!

電影以孔明的網絡熱爆小說《失蹤》改編,雖然阿嬌和小龍開拍前未睇過,但因故事吸引、加上監製伍健雄關係而接拍,而阿嬌更坦承本身對真人真事特別感興趣,「呢個故事係真人真事,自己一向都好鍾意睇啲真人真事嘅電影,所以有機會都想拍。」

自揭患人群恐懼症

  劇中阿嬌飾演7年前父親行山失蹤、一直未有放棄尋父的社工「薛芷盈」,由於期間誤入「結界」,所以當中有不少情緒失控的戲份,雖然阿嬌自問不是容易受角色影響情緒的人,但由於同時間要拍電影《女子監獄》,又要拍內地真人騷《爸媽學前班》,搞到她終於忍唔住要爆啦!阿嬌說:「嗰時我真係冇時間做番自己,拍真人騷嗰段日子我真係抽離唔到,將拍嘢嘅情緒,將脾氣發晒喺佢(老公)身上,仲要嗰時未結婚!」追問阿嬌老公會否嚇窒咗,見到呢一面?小龍即代答:「即係冇問題,都結咗婚!」阿嬌更自爆跟老公拍完真人騷後互相更了解,「佢拍完就會明白,平日咁多鏡頭對住,做咩都有人影住係咩感覺,係會有幾大壓力!」阿嬌又好多謝今次電影團隊好多正能量,「我其實係有少少人群恐懼症,同埋唔知點同人相處,尤其係陌生人,今次大家不斷鼓勵大家,互相支持感覺好好。」

有緣再合作舞台劇

  除了情緒,阿嬌話這套戲需要體力一樣大,因有不少喪跑戲,拍攝時仲自己行上山拍攝,「最初都擔心㗎!我平時冇做運動,都驚抽筋、唔夠力、嘔咁樣,所以有去啲行山用品舖買定啲能量食品同燈咁,後尾都冇拎過出嚟用,證明自己體力都OK。」講到戲中的樹林戲,小龍透露拍得特別辛苦,「除咗拍嘅時候啲工作人員要抬啲器材上去辛苦,最慘係拍拍吓,遇到颱風山竹,好多樹林冇咗,又驚嗰樹易掉落嚟會有危險,結果搵咗好多公園。」阿嬌補充:「有啲其實係空地嚟,真係好考佢哋功力。」

  戲中阿嬌和小龍雖然冇感情戲,只飾演鄰居,但也有不少對手戲,小龍謂有機會集齊Twins好開心,「佢由細我睇到佢大呀!(阿嬌:我哋一齊成長!)好開心好玩,之前舞台劇(《情敵勸退師》)同咗阿Sa(蔡卓妍),今次同埋阿嬌,Yeah!齊咗Twins啦!」問阿嬌會否想下次她跟小龍合演舞台劇,她想了想說:「真係好難,睇緣份,隨緣啦!但如果演舞台劇首選同小龍合作。」問到兩人下次想合演何種關係,小龍繼續搞鬼:「keep住做鄰居,可能我劈佢呀!」

撰文:杜淑霞 攝影:李維隆 髮型:Amber Tse @ IL Colpo Central(阿嬌)、 Alva Lam(小龍) 化妝:Yan@Ndnco(阿嬌)、Connie Lai(小龍) 服裝:Polo Ralph Lauren(阿嬌) 場地:香港九龍貝爾特酒店

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd