首頁 日報娛樂

食店蝕錢個唱煞停 黃翊歎就快要乞食

22/11/2019
■黃翊位於大埔墟街市頂層的食店,即使政府減租一半都係要蝕錢。
■黃翊位於大埔墟街市頂層的食店,即使政府減租一半都係要蝕錢。 (1/6)

  受社會氣氛影響,飲食業首當其衝,演藝界同樣受波及,等咗26年終於可以喺樂壇翻生的黃翊竟然「中」兩瓣,在大埔墟街市頂樓經營的食店生意急跌7成,每晚黃金時段得番幾枱客,蝕到入肉!原先打算明年4月喺麥花臣再開演唱會都急急煞停:「人哋張敬軒演唱會都要取消啦,你係黃翊啫,唔係叫取消,係收皮呀。再咁落去,我哋咪要eat banana?」 採訪:方騫平



  食店蝕錢,演唱會又被叫停,黃翊相當無奈,他說:「我哋做夜市生意更加難搞,因為交通問題,入夜啲人就唔出街,放工即返屋企食飯,扶老攜幼更加唔方便,怕冇車搭,之前黑衣人曾破壞過我哋熟食街市嘅大堂,要圍板裝修5日,加埋大埔堵路,做咗十幾年生意從未試過差成咁,好老實講,我都想你可以教吓我點算好。」

  問到應變方法,黃翊坦言無晒計,「真係要去問高人,自問智商好低,諗唔到有乜方法可以解決到,我真係好煩。都冇乜應變辦法,因為食店喺政府大樓經已減租一半,所以申請唔到中小型飲食業應急錢,師傅做咗好多年就冇得Cut,一樣都係咁嘅糧,唯一盡量叫散工唔使返工。」黃翊愈講愈灰,「唯有堅守香港精神捱住先,頂得就頂,希望香港狀況可以平息得到,但相信需時較長。不過,因為過年後街市要大裝修半年,哈!嗰半年唯有拎枝結他去隧道乞吓食度日,到時經過見到黃翊唔好畀硬嘢,最少都畀兩條嘢我,要軟嘅。」

  講到喺樂壇難得翻生,黃翊更氣餒:「我冇唱20幾年歌,直至兩年前受到大家注意可以出返嚟,諗住努力想做啲嘢,本身想再搞演唱會,o依家都唔敢再搞住,好彩之前申請場地係後備第4,排到第3個已經攞咗個期,否則死得更慘。」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd