首頁 日報娛樂

發文控訴中TG苦況 黃澤鋒妻慘被抽Job兼攻擊

22/11/2019
■黃澤鋒上周四去澳門工作,兩公婆就帶埋「小黃妃」同行,順便避開TG一陣。
■黃澤鋒上周四去澳門工作,兩公婆就帶埋「小黃妃」同行,順便避開TG一陣。 (1/5)

  今年7月,黃澤鋒太太陳麗麗以52歲高齡誕下囡囡「小黃妃」,兩公婆開心到飛起,乜都以寶貝女為先。家住屯門的他們,全家中晒催淚煙,「小黃妃」食人奶後,搞到身體出晒紅疹,又痕又痛又忟憎,兩公婆睇見就心痛。日前陳麗麗喺社交網站發文控訴:「點解?你可以有裝備去應付!點解?平民百姓就要赤條條去受這痛楚!」事後她被惡意攻擊,有人inbox閙她:「係咪老懵咗?定產後抑鬱發作?」亦因為風頭火勢,部份Job都被Cut,非常無辜。採訪:方騫平



  食TG後,黃澤鋒狂咳,兩母女就持續出紅疹。幸好「小黃妃」得4個月人仔只會喊,未識得搲,唔怕會搲損留痕。陳麗麗說:「根據衞生防護中心提醒哺乳媽媽,接觸催淚氣體後兩小時避免餵母乳,我有按指引去做都唔得。日前我帶BB去覆診都再有請教醫生點樣去解毒,連醫生都冇能為力,因為根本冇人清楚TG成份,唯一只能處方類固醇頂住先!」

患處塗人奶

  黃太深感無奈不斷唉聲歎氣,「唉,真係好無助,其實經已盡量少帶個女落街,逼不得已先抱埋佢落去買餸,o依家我耳背、胸口都出咗紅疹,而且擴散上頸,部份仲惡化到有膿頭,患處好㷫。我只能喺患處搽返自己嘅人奶去自救,先用BB消毒紙巾抹乾淨,底層先搽浸BB油,跟住再揩人奶落去,風乾後再搽啲純天然既金盞花膏同茶樹膏,至於小黃妃個大髀都出到一撻撻,佢都係搽我啲藥膏同人奶。」

  對於被圍攻,陳麗麗好嬲,但最嬲係被網民曲解咗意思,她為當日出post解畫:「其實我冇怪責警察用催淚彈驅散示威者,但唔贊成佢哋無緣無故,喺冇需要情況下對住空氣亂射TG,咁樣會令到市民受苦。雖然唔係百份百贊同警方做法,但唔代表係敵對立場,我只係用媽媽視覺出發,希望可以保護到家人,喚起大家關注啫。」

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd