首頁 日報娛樂

出巡行街晒溫馨 梁詠琪楊愛謹老公 奉旨接 「收工」

27/11/2019
幫手拖住
■楊愛謹有老公郭永淳一齊拖住紮紮跳囝囝,她舒服晒!
幫手拖住 ■楊愛謹有老公郭永淳一齊拖住紮紮跳囝囝,她舒服晒!(1/9)

        梁詠琪(Gigi)和楊愛謹(Miki)自升呢為人母,Gigi一路Keep住做嘢兼開舖做生意,仲要湊埋4歲長腿女兒Sofia好鬼忙。相對Miki就歎得多,嫁咗畀永安太子爺郭永淳(Edwin)嘅佢,三年抱兩湊成個「好」字,不過湊住兩個一樣好似返工咁忙。早前兩位靚媽先後現身銅鑼灣利園商場,Gigi帶住Sofia巡完舖再去行街睇衫時,Gigi西班牙籍老公Sergio突然現身畀意見兼接她們離開。輪到Miki,她都係湊住兩歲囝囝Luken行完街,老公Edwin忽然出現陪兩母子遊商場兼等車回家。兩位人夫都好Sweet呀!

採訪:梁志明

        43歲Gigi去年開完演唱會,原本話想追多個B,等Sofia有個伴,點知佢跟住又同老公開咗童裝店,仲有兩間咁多,加埋拍戲同個唱等工作,Gigi真係分身乏術!至於34歲的Miki,曾笑言湊住兩歲囝囝Luken和8個月大的囡囡Emma,仲辛苦過連踩19個鐘拍戲,她解釋以前做嘢係俾人照顧多,現在她卻要落手落腳去湊小朋友,既要照顧兩兄妹的起居飲食,又要陪他們玩鬥智鬥力,她曾苦笑說:「真係從未如此辛苦過!」兩位靚媽咁辛苦,做老公嘅又點可以冇啲表示。

幫手睇女

  早前Gigi帶住女兒Sofia到利園巡完舖,再過隔離的時裝店45R睇衫。只見Gigi鍾情長裙,而Sofia都好乖巧,一路玩住汽球一路站在媽媽身邊等候。當Gigi入去試裙時,老公Sergio突然現身,除咗即刻幫Gigi睇實個女,又會幫手畀下意見。搞咗大約半個鐘,Gigi終於買到心愛嘅長裙。此時Sofia等得耐覺得攰,爸爸即刻抱起她、安撫她,等Gigi可以安心去畀錢。離開時,Gigi負責拖女,而Sergio就梗係做阿四幫手拎嘢喇,體貼程度攞滿分,難怪Gigi有老公在身邊一直甜笑,So Sweet!

Call車走人

  一向話湊仔唔假手於人嘅Miki,日前帶住兩歲囝囝Luken去利園行街,行到傍晚,老公Edwin忽然出現,除咗幫老婆拎咗袋戰利品,又即刻打電話Call車返屋企,可惜座駕遲遲未到。只見Luken企唔定郁嚟郁去,又不時企上媽咪對白波鞋度勁貪玩。Edwin怕老婆辛苦,叫太太囝囝坐埋商場石壆等候,夠晒貼地,其間佢攬實囝囝陪佢玩,等Miki可以鬆一鬆。之後他覺得一直等唔係辦法,索性入番商場行。上商場樓梯時,Luken跣腳差啲跌低,好在Edwin夠眼明手快扶起囝囝。老公「護駕」有功,Miki自然舒服得多。

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd