首頁 日報娛樂

為o氹囝囝開心 Coffee周圍搵迷你籃球

29/11/2019
■Coffee攞住個籃球仔,笑住講電話。
■Coffee攞住個籃球仔,笑住講電話。 (1/8)

  Coffee(林芊妤)自從一年前生了網紅B仔伯伯(暱稱)後,一切都以囝囝行先,接受《頭條》專訪時,更講明怕囝囝唔黐自己,寧願繼續餵人奶。呢日寵仔無極限的Coffee,單獨現身銅鑼灣,去運動用品舖搵小朋友玩具,原來早兩日伯伯愛上玩籃球,廿四孝媽咪就即刻做嘢,周圍搵個迷你版畀心肝椗玩囉! 採訪:梁志明

  Coffee囝囝翟德彥(因外形老積被暱稱伯伯),憑住米芝蓮肥美身材,加埋充滿佬味的樣貌及厭世表情,個人社交平台粉絲已衝破10萬,隨時多個不少藝人及KOL。身為伯伯頭號粉絲的Coffee,接受《頭條》訪問時亦自爆餵囝囝人奶到o依家,全因自己變態唔捨得放手,怕唔餵人奶囝囝就唔再黐自己。

  o依家伯伯13個月大,開始學行同識同人玩,早幾日Coffee喺伯伯ig分享帶住伯伯陪老公翟志榮去打籃球,點知伯伯爬住都要同嗲哋爭波玩,離開時更加攞住個大籃球唔肯放手,Coffee當然知道囝囝鍾意咗玩波波,但正常size籃球伯伯根本玩唔到,梗係要即刻搵個啱伯伯手形的小籃球啦!

  話口未完呢日下午3點幾,就見到Coffee單拖現身銅鑼灣,見佢去撳完錢就一個箭步上咗間舖頭,仲即刻問職員係咪有小朋友玩具賣,好快就搵到個價錢24蚊啱晒伯伯玩嘅小籃球,不過Coffee好小心,睇完一輪再影埋相先去畀錢,相信佢為搵波波都行咗好多間舖,見佢走人時攞住電話係咁講,幫囝囝買到啱口水玩具個滿足樣,寫晒上面啦!

其他文章
莊思明拍劇等嫁 王子涵演技被讚恨做女一

大馬拿督女莊思明(Lisa)和導演王晶的寶貝女王子涵(Ada),因有共同朋友而認識,並...

hd