Executive日記——馬時亨偉仔親身到賀 詠春名醫搬醫館 開心露一手

        有好多城中名人迷絲嘅中醫張勇,醫館朝早應診,晚上就變成習武場館,教人以詠春強身健體,醫武相傳,近日佢嘅中醫館就由九龍搬咗去灣仔,唔少名人例如港鐵主席馬時亨、影星梁朝偉都到賀,星光熠熠!張醫師仲即場表演詠春!

        張勇醫館原址在九龍佐敦廟街,近日順利搬到灣仔謝斐道,繼續行醫,開幕當日唔少名人致送花籃到賀,部份名人例如港鐵主席馬時亨、影星梁朝偉親身到來祝賀,張醫師見咁多人咁有心,即場表演打樁,佢亦邀請曾拍攝「葉問」嘅偉仔即場表演,不過偉仔當日着咗好多衫,話唔太方便表演啦,小妹真係覺得好可惜!

  張勇醫館平時朝早會睇症,晚上就化身武館, 教授詠春強身健體,醫武相傳可謂醫館嘅「金漆招牌」,佢仲曾經寫過一本《正宗佛山詠春拳》嘅書(小圖),將詠春拳發揚光大,小妹佩服佩服!

Kelly Chu

hd