Executive日記——香港「好人好事」 網友義載公公婆婆

  助人為快樂之本,Kelly同大家分享一件好人好事,話說有位網友早前見到一對公公婆婆截唔到的士,於是開車義載佢地一程,到達目的地仲獲贈一封「利是仔」,網友話「果刻覺得好窩心」,希望鼓勵大家多啲幫人,唔好吝嗇自己嘅力量。

  O個位網友喺社交網站分享呢段好人好事(見圖),佢話昨日見到O個兩位公公婆婆企喺馬路邊截唔到的士,於是食完早餐行返上車後,「突然靈光一閃」,上前問吓佢地去邊,話唔介意車埋佢地,婆婆當時就擔心會阻到佢,但網友二話不說,立刻搬開車上雜物示意佢地上車。

  網友用左二十分鐘就車左佢地到目的地,其間大家「有講有笑」,婆婆落車前仲送贈一封「利是仔」,網友話喺半推半讓下接受,更坦言「果(嗰)刻覺得好窩心」,希望大家多啲關心身邊嘅老人家,無論相識與否,其實出少少力已經幫到好多人。Kelly聽完都有啲感動,希望之後仲有更多好人好事同大家分享。

Kelly Chu

hd