Executive日記——最快明年可空中上網 輕身慳油 國泰A350明首航

        搭長途機,Kelly最着重舒適度同埋娛樂節目,國泰航空最新抵港嘅空中巴士A350就可以滿足晒小妹呢兩個願望嘞。將於明日投入服務嘅A350客機,集輕身、省油及長途飛行等優點於一身,配合可調整嘅機艙座椅及頭枕,以及最快明年推出嘅機艙寬頻網絡,在空中旅程都可以登入社交媒體同朋友聯繫,Kelly唔使再怕搭長途機悶親啦。

        國泰早前訂購四十八架A350客機,首架客機前日抵港,明日投入服務,負責一班即日往返馬尼拉嘅航班,而其餘新飛機將在二○二○年前陸續交付本港。究竟A350有咩咁犀利?Kelly昨日有幸先睹為快,客艙共有二百八十個座位,可以不停站飛行一萬五千公里,仲有較低嘅艙壓及噪音水平,而客機採用新型號引擎,燃油和成本效益將較舊飛機提升百分之二十五。

  Kelly踏入機艙,發現商務客艙座椅加配多項新設備,包括觸手可及嘅額外貯物空間,娛樂系統亦附設「請勿打擾」和「喚醒」嘅個人化服務。每張特選經濟艙座椅亦附設可伸展嘅擱腳板,配合埋可供調校最舒適角度嘅新座椅設計,坐得耐都唔怕啦,經濟艙嘅頭枕仲係國泰獨家設計,提供六個調整模式,瞓得更舒服。

  國泰首度於機隊引入寬頻網絡,乘客可付費瀏覽互聯網、收發電子郵件及登入社交媒體,以及觀賞電視直播頻道,但不適用於媒體串流服務,最快明年推出,到時Kelly就唔怕悶,一邊飛一邊同親友保持傾偈,包保旅途唔會悶啦。

Kelly Chu

hd